Tomografî Qanser Virazeno

Wezaretê tenduristîye yê Îngilîstanî roja 06.04.2010 de qerarêko zaf muhîm girewt ke ganî kesê bisihetî tomografî nêancê. Sedemê qedexekerdişê tomografî no yo ke, demeyê antişê tomografî de radyosyonêko zaf zêde vila beno.

Naye ra ver, nêweşîyê sey qelbî, osteoropoz, xetimîyayîşê damaran û dîyabetî, seba ke rew tesbît bibê, doktoran tomografî tercîh kerdêne. Hetanî nika pisporanê tenduristîye pêşnîyaz kerdêne ke her panc serran ra reyêke tomografîyo ke hemeyê wucûdî sehneno, bîyero antiş. Labelê nika tesbît bîyo ke tomografî rontgenêkê normalî ra 400 qat vêşêr radyasyon vila keno. Coka Îngilîstan de qerarê qedexkerdişê tomografî gêrîyayo. Çunke mîyanê nêweşanê ke tim dekewenê tomografî de, rîyê radyosyonî ra 50 kesan ra yewêk de nêweşîya rîşa merdimwere (qanser) peyda bena.

Goreyê raporanê ke derheqê na babete de ameyê weşanayîş, merdimanê ke pêsero kewnê tomografî de radyasyono ke yeno pêser, qasê radyasyonê merdimanê ke Hîroşîma û Nagazakî de birîndar felitîyay ra vêşêr o. Seke yeno zanayîş, şerê cîhanî yê diyine de bombaya atomî erzîyabî bi şaristananê Japonya Hîroşîma û Nagazakî.

Pisporî vanê, rontgenêko normal de seba ke fîlmê wucûdî kaşbikero, tena yew tîrêj vila beno la seba fîlmê bidetay yê tomografî têdima zaf rey tîrêjî vila benê. Serra 2009î de Unîversîteyê California ra prof. Rebecca Smith-Bindman 1.119 kesî ser o yew cigêrayîş viraşto. Goreyê netîceyê nê cigêrayîşî, 1 rey tomografî qasê 442 rey rontgenanê fîlmê sêneyî û 74 mamografî (fîlmê çicikan) ra vêşêr radyasyon vila keno.