TOPÊ FITARE

Yew luye misaletê kerganê yew dewe bena. Dewe de çiqa kergî estê yew bi yew tepişena û wena. Dewijî kerganê xwu çendêk mihafeze kenê, la luye bi qurnazî û bi fen cayêk ra xwu çep kena û kerganê dewe bena, wena. Rojêk dewijî neçar meydanê dewe de kom benê. Pîlê dewe vano “De kerem bikerê! Her kes bi dore wa fikrê xwu vajo, hela ma çi tewir heqê ena luye ra vejyenê." Dewijî yew bi yew fikrê xwu vanê, la yew rayîrêk tira nêvecenê.

Peynî de yew vano “Şima mi rê yew kerge biyarê, mi bomba viraşta, ez dekena zerreyê ci û kiştê dewe de ronena. Luye wexto ke biyo kerge biwero go bomba biteqo û luye bibo wel û werdî, o wext ma luye ra xelesyenê."

Dewijî pêro eno fikrê mêrikî ecebnenê. Mêrik vano “De mi rê kerge biyarê!”

Hasilê kelam, mêrikê to kerge hederneno, tewerê eewe de cayo ke luye bivîno roneno. Edî dewijî paweyê mergê luye vindenê.

Demêk vêreno, dor û ver de kes nêmaneno, luye vana “Êdî wextê seydê mi ameyo. Ez hetê dewe ra şêrî." Luye derûdorê xwu ewnîyena û boça xwu ya pele şanena têra û bi fenanê xwu yê ecêban hetê dewe ra kewena rayir. Yena nizdîyê dewe, kerga ke dewijan semedê werê ci ronaya, vînena. Ca de vindena ewnîyena kerge ra, kerge qet xwu nêleqnena û vaznêdana. Luye vona “Îta de yew plan esto, hela ez tay temaşe bikerî, dê se beno…"

Luyê fam kena ke kerge normal nîya. Kerge ra dûrî vindena û temaşeyê ci kena. Tay zeman vêreno, yew verg yeno. Verg ewnîyeno luye ra û ewnîyeno kerge ra, vano "Herê luyê! Ena çi mesela ya, ti qey kerge nêwena?" Luye vana "Ez ha roje ya." Verg vano ez roje nîya ez biwerî?" Luyê vana "Kerem biker, kek Verg!" Verg şino hetê kerge ra, senî ke gaz dano kerge ro, bomba teqena, kerg yew heta perena, verg zî birîndar, miyanê gunî û gunaşîrî de xemêyeno. Waka luyê bi keyf cayê xwu ra wurzena şina dest bi werdişê belateyê kerge kena.

Demêk vêreno, verg çimanê xwu akeno, eke luye ha kerge wena. Verg vano "Herê qancûx, herê oyinker! To va ez ha roje ya, kek verg…" Luye bi qurretî hem werê xwu wena hem zî cewab dana, vana "Hero kekê mino kerro bêaqil, vengê topê fitare nêame to qey?”