Transîtportero Çeqer û Borane

Rocê Transîtportero Çeqer kewto raye. Zaf lez kerdo. Henî lez şîyo ke raye de hayî ro dêsî nebîyo. Ginayo dêsî ro û dês cor ra ameyo serê Transîtporterê Çeqerî. Kaportayê Transîtporterî pêro şikîyayo, bîyo xurd û xaş. Binê dêsî de berbo, zîbo feqet kes o nêheşnayo. Veng kerdo xo ra qîrrayo, vato:

- Law Homay kenê mi rê ardim kerê, mi bine nê enqazî ra vecê! Qomo keso!

A sira de azmên ra yew borane derbaz bena. Borane heşnena ke yew ha yo zîbeno,  ardim wazeno. Perranê xo a het de şiknena û serê enqazî de ena war. Bado ke ena war, veng  kena piro vana:

- Bira ti kam a, çi halde ra? Veng vece.

- Ez Transitportero Çeqer o. Bine nê kemer û kuçan de mendo. Homay sînena mi rê ardim bike.

- Meterse ez nika şino hete dozerî û ma pîya dest ercenîme to.

Borane raperîna şona lewê dozerî. Dozerî ra hal mesel ke neql kena. Pîya urcenê ra kune raye ênê verê enqazî de vecînê. Goş nanê pa ke Transîtporter ha yo zîbeno. Borane şa bena ke hîna veng ci ra yeno, ha yo ciwîyeno.

Badê cû dest pêkenê bloqê çîmentoyî berz kenê. Berz kenê nêkenê nêqedîno. Peyê peyênî de Transîtporterê Çeqerî binê enqazî ra vecenê.

Vinenê ke kaportayê Çeqerokî pêro şikîyayo. Telefonê xelaskerê wesaîtan kenê. Xelaskerê wesayîtan ke ame, zincîle giredanê û Çeqerokî kaşkenê benê tamîrxane. Usta ke halê Çeqerokî vîneno ci ra terseno. Xo xo de vano ez nêşkîno nêyî hel bikerî. Dano piro gurîyêno hetano şodir, zereyê otomobîlî de çiqas cayo şikite esto tamîr keno. Welhasil roja hîreyîne Transîtporterî newe ra ano dinya.