VARAYIŞÊ TÎTIKAN

Ne ê ke zereyê firokeyê şerî de bî ne zî şarê qesaba peşmirîyayişê leşkerî dî.

Na reya verêne nêbî ke tîtikî varayêne. Tutanê ke reya verêne de vazdaybî şîbî meydan na rey eksê ci de remayêne. "Tweet bird"a masayîye û Muharem pîya teqaybî verê çimê ey de. Hevalê eyê ke qolê înan cira bibî, kayanê ey ra kemîyaybî.

Adil tena werişt. Tena sereyê xwu. Reya verêne bî ke varayişê tîtikan dîyêne. Çar rojî bî ke ameybî na qesaba. A varita ke dadîya ey bi rojan duayî kerdbî ke bivaro, herhal na bîye.

Melayî mînare ra veng dabi, milet îqaz kerdbi, la seba ke ey ziwanê ucayî nêzanayne, fehm nêkerdbi.

Gama ke tîtik kerd verara xwu ferq kerd ke linganê ci wa yew çiyo giran beste yo. Ca de anêkerd. Ver bi dadîya xwu vazda şi ke mijdîyane bido vajo duayê to qebûl bî.

Cinîke, tut verare de, bi qîrayiş ver bi Adilî vazda, do tîtik ci ra bigirewtêne, Adilî lez kerd. Badê pey sewbîna merdimî zî kewtî ey dima. Asmên ra zaf tîtikî varaybî, qey tîtikê ey ci ra girewtêne? Senî ke hoka kuçeyî ra tadîya, bero verin ro kewt zere, pey de xwu derêna û tîtik pêt kerd xwu verare.

Goşdarîya vengê lingan kerd ke ameyî nêzdî û vîyartî şî dûrî. Badê ke vengî birîyayî, werişt payanî. Nêeşka xwu de bigêro, ey do paketa binê tîtikî akerdêne. Badê ke nêeşka lakê ci bivisno, bi dindanan kewt ser, la nêbi. Çim gina gire ro. Lak berd û ard la gire hîna wuşk şidêya. Areqê çareyê ey tîtik şutêne û çilkayêne betonî ser.

Badê ke gire akerd, hema ca de pakete anêkerde. Bineyke nefes girewt. Waşt bi keyfê zerrîya xwu akero.

Areqê ey bibi zuwa.

Eke lak bi sist, pakete zî bin ra bi xwu abîye. Rengarengî bî. Zerrhelinî bî. Çîkolatayinî bî.

Fekê xwu girewt û keyfê xwu zereyê xwu de tepîşt, tersa ke do bêrê tîtikê ey ci ra bigêrê.

Ewnîya asmên ra û peşmirîya.

Ne leşkero ke firokeyê şerî de bi ne zî şarê qesaba peşmirîyayişê Adilî dî.

Tirkî ra tercume: Roşan Lezgîn

_________

Ena hîkaye "Newepel, hûmare 96, r. 5" de weşanîyaya.
Bê musadeyê nuştoxe û rojnameyê Newepelî yewna ca de weşanayiş qedexe yo.