Verî umetî rê dima ma rê…

Çekuya dua (دعاء) erebkî ya, yena manaya “gazî, wesênayiş, lavey kerdiş, Homayî ra ardim waştiş”.

Dua manen hêz dana merdimî, enerjîyê merdimî û nîsbetê serkewtişî zêdnena, karê merdimî kena asan…

Wexto ke merdim keweno tenge û dua keno, heqîqeten yew hêzo ekstra merdimî de yeno meydan, enerjîyê merdimî zêdîyeno. Eke merdim tenge de nêbo, halo rehet de zî xwu rê dua bikero, manewîyatê merdimî beno pêt, îşê merdimî werê yeno.

Labelê miyanê ma kurdan de, çiyo ke mi hetanî nika dîyo, çi misliman, çi elewî, çi yarsan, çi êzidî ferq nêkeno, wexto ke dua kenê, verî şarî rê kenê dima xwu rê kenê. Mesela, vanê “verî umetê Muhemedî rê dima ma rê…”

Enê vatişî de yew fikro însanî esto, merdim fam keno ke xêrê pêro umetî wazenê labelê wexto ke vanê “Ewilî umetî rê dima ma rê, dima tutanê ma rê…” neheqî bi xwu kenê. Çira? Verî ma biewnîn hela “umet” çi yo.

Verê cû, ma vajin ziwanê aramî de sewbîna manayê xwu bibê zî ewro miyanê miletê ma de çekuya umet (امّة) yena manaya “komelê îslamî”, yanî kamcîn miletî ra benê wa bibê, çiqas merdimê ke dînê îslamî qebûl kerdo, pêro têdir benê “umet”.

Miletê ke miyanê “umetê Muhemedî” de yê, hema vajêne zafê înan dişmenê ma kurdan ê, qismêkê înan qatilê ma yê. Înanê ke raşteraşt ma qetil nêkerdo zî, xêrê ma nêwazenê; qayil ê ke ma tim bindest bin, tim miyanê ligan de bin…

Heto bîn ra, miyanê “umetê Muhemedî” de dizdî estê, sextekar û hîlekarî estê, tecawuzkarî estê, îşkencekarî estê, qatilî estê, wehşî estê, zalimî estê, her tewir xirabî estê…

Ma se kenê?

Ma xwu rê dua kenê; ma Homayî rê lavey kenê, ma ardim wazenê. Labelê ma vanê wa Homa verî ardim bido înan, dima bido ma!

Wexto ke ma vanê “verî umetê Muhemedî rê dima ma rê…” eslê xwu de ma serkewtişê înan wazenê, hema vajêne ke ma bara xwu zî danê înan.

Hetêk ra zî ma vanê Homa çira hetê ma nêkeno!

Bi eno qeyde Homa senî hetê ma bikero?

Eger ma dua kenê, gereka ma raşt dua biker. Verî xwu rê dua bikerê, dima qedeme bi qedeme dorê xwu rê û miletê xwu rê bikerê, peynî de zî kesê ke heqîqeten heq kenê, înan rê bikerê.