Weqfa Îsmaîl Beşîkçî Ronîya

Weqfa îsmaîl Beşkçî ke bi grûbêk roşinbîr û karsazan nêzdîyê serrêk o ke xebata awankerdişê aye dîyayo destpêkerdiş, bi îlanê ke roja 29.11.2011 yê Rojnameyê Resmî û nuşteyê tescîlkerdişê yê Mudirîya Pêroyî ya Weqfan resa netîce û bihawayêko resmî ronîya.

Komîteya awankerdişî ke Îsmaîl Beşîkçî, Îbrahîm Gurbuz, Îshaq Tepe, Talat Înanç, Abdullah Baran, Ruşen Arslan û Ehmed Onalî ra yena pê, derheqê ronayîşê weqfe de wina melumat da: “Ma waşt nameyê Îsmaîl Beşîkçîyê ke sey wijdanê merdimîye, rîsipîyîya zansitî, rûmetê roşinvîran û bi helwêsta xo ya biryardare ke zerrîya heme hêzanê demokrasî û şaran de ca girewto bi weqfêk biresnin neslanê ameyayan.”

Beyanatê komîteya awankerdişê weqfe wina dewam kerd: “No cîhano ke tede erjê însanî, zanistî, kulturî û etîkî yenê dejenere kerdene, termê sey huqûq, edalet, demokrasî û heqê merdiman ke bi mueyîdeyanê îdarî û cezaî yê îdeolojîya resmî yenê pelixnayene, erjê etîkî û dînî ke goreyê berjewendîya dewlete yenê şuxulnayene, “pereyo ke bîyo Homayo ke seba ey merdimî yenê qurban kerdene”, cîhanêko winasî de ma bi wezîfeyêko pîroz rî bi rîyê ke fikrê Îsmaîl Beşîkçî û eseranê ey biresnin neslanê amayeyan.

Ma sey Weqfa Îsmaîl Beşîkçî xo rê kerdo hedef ke nameyê Îsmaîl Beşîkçî, fikr û eseranê ey bidin ciwînayene; warê zanistî, sosyalî û kulturî de cigêrayîşan virazin, kitabxane, dezgeyanê zanistî, kulturî û perwerdeyî akerin, merkezanê arşîv, dokumantasyon û kulturî awan bikerin, muze û enstîtuyan akerin. Nînan ra teber zî ma xo rê kerdo amanc ke musabeqayan organîze bikin û nameyê Îsmaîl Beşîkçî ser o xelatan bidin, fealîyetanê medya, çapemenî-weşangerîye bikin.

Paralelê awankerdişê weqfa ma de zereyê weqfa ma de Kitabxaneyê Cigêrayîşî yê Îsmaîl Beşîkçî zî awan bîyo. Koleksîyon û arşîvê kitab, kovar û rojnameyan ke Îsmaîl Beşîkçî nêzdîyê 60 serran o bi kedêka pîle arêdayo û wayîrê muhtewayêka dewlemende yo, nêzdîye de do seba xizmetê cigêrayox û wendekaranê ke eleqe nîşanê kulturî danê amade bibo.”

Komîteya awankerdişê weqfe veng ro heme merdimanê demokratan kerd û wina va: “Ma zanê weqfa ma ya ke xo rê cigêrayîşê waranê zanistî, sosyalî û kulturî kerdo hedef, merdimanê ke nameyê Îsmaîl Beşkîçî sey erjêk qebul kerdo û bawer kenê ke zansit û huner averşîyayîşê komelî de rolê xo esto de heyecanêko gird viraşto. Ma venga her kesê ke bawer keno Weqfa Îsmaîl Beşîkçî waranê zanistî, sosyalî û kulturî de cematî rê ufqêko newe û ceribnayîşanê neweyan ana meydan, ancî seba viraştişê projeyanê neweyan ke layîqê nameyê Îsmaîl Beşîkçî yê de hesas ê, ma venga înan danê ke wa bibê dilxwaz û paştgîrê Weqfa Îsmaîl Beşîkçî.”

Weqfa Îsmaîl Beşîkçî na adrese de fealîyet kena:

İsmail Beşikçi Vakfı

Kuloğlu Mah. Ayhan Işık Sok.

No: 21/1 Beyoğlu-İstanbul