Weşanxaneyêko Newe û Di Kitabê Neweyî

Bi nameyê “Weşanxaneyê Roşna” yew weşanxane ke do bi kirdkî kitaban biweşano abi û bi di kitaban dest bi cuya xo ya weşane kerd.

Kitabê yewin ke Weşanxaneyê Roşna ra vejîyayo kitabê hîkayeyan yê Bedrîye Topaçe bi nameyê Bero Sûr, kitabê diyin zî bi nameyê Tarîyîya Adirî de kitabê hîkayeyan yê Roşan Lezgînî yo.

Kitabê Bedrîye Topaç Bero Sûr de çarês tene hîkayeyî estê. Qismêkê nê hîkayeyan verê cû kovara edebî hunerî Şewçila de weşanîyaybî la qismêkê înan reya verêne kitab de ca gênê. No kitabo yewin yê nuştoxe yo. Eynî wext de reya verên a ke yew cinîya kirmance edebîyatê ma de bena wayîra vatişî û kitabêkê edebî weşanena. Nuştoxe hîkayeyanê xo de ziwanêko alegorîk û estetîk şuxulnayo. Yew hîkaye de vana: “Tenayîye tewr peynî de mi bena verê yew berî. Ber sûr o. Mîyanê hende beran de yew bero sûr. Ez berê sûrî cenena. Berê qedexeyî. Ber hêdî-hêdî beno ra. Yew vayê wisarî gineno rîyê mi ro. Merdimo ke mi xeyalanê xo de weye kerdo nika duştê mi der o.”

Kitabê hîkayeyan yê Roşan Lezgînî Tarîyîya Adirî de zî duwês hîkayeyî estê. No kitabê çarin yê hîkayeyan yê Roşan Lezgînî yo. Yew hîkayeya nuştoxî ra paragrafêk wina yo: “Destê to veşeno. Veşayîşêko şîrin, xorîn. Adir serê destê to ra şino reseno mîyanê reyanê to. Gonîya to ra vila beno. Heme canê to ra vila beno. Orteyê zerrîya to de ca gêno, zerrîya to seraser bena bizoteyê adirî. Adir ra tofan rabeno, puk û pukelekê adirî, torg û torseleyê adirî varenê. Hende varenê, hende varenê, her ca beno laserê adirî. Dinya hende veşena, ti hende veşenî, kef keweno to ser. Kefê adirî. Çimanê to ra hesirê girênayeyî, hesirê kelbîyayeyî yenê war. Nefesê to sey hewayê cehenemî girêyeno, helmê to eynî kila adirî. Ti şuûrê xo kenê vîndî. Hiş û aqilê to bin ra vindenê.”

Her cayê dinya ra biwazîn, mîyanê hewteyêk de kitabî destê şima de yê.

Adresa Waştişî: rlezgin@hotmail.com

Dîyabekir de cayê ke kitabî tede roşîyenê:

Aram Kitabevi

Gevran Cad. Konukevi No: 1/A

Ofis – Diyarbekir

Avesta Kitabevi

Ekinciler Cad. Nurlan Apt. No: 2

Ofis – Diyarbekir

Urartu Kelepir Kitabevi

Ekinciler Cad. Kürüm Apt. Kat 1 No: 1

Ofis – Diyarbekir