Wextê Velgan

Şewa bîne wexto ke ma xewxî û hengure werde, kalikê min nişkêk ra vindert û awnîya ezman ra. Badê joy ke fetelîya min ser û va “Law, dê wurze meskîyanê ma veje. Biewne na wo qurix vejîyawo. Henî wextê velgan o.”

Gama ke wina va, min sereyê xo kerd berz û awnîya ezmanî ra. Kalikê min bi engişta xo ezman de cayê qurixî da ra mi şanî. Estareydo pîl o, mîyandê estarandê bînan de bereqêno û lerzeno. Min kalikê xo ra persa: “Kalo, çî rê wexto ke qurix vejêno şima vanê henî wextê velgan o?” Kalikê min va: “Law min dîyo nêdîyo wexto ke peynîya tebaxî de no qurix vejêno, ma danê velgan ro. Însananê ma yê verdê joyî, o wext çî bi enê awayî zanayne. Wexto kalikê ma Bed şino seferbeglike hewt serrî Yemen de maneno. O wext saete, teqwîm çinê bîyê. Kalikê min vatê, wexto ke ez ewca bîya wesar, hamnan, payîz û zimistan çinê bî. Yemen sade çol bi û kiçî nêzanayne wext çi yo. Serdê tebaxî de wexto ke bîyê destê sibayî qurix vejîyayne. Min o wext zanayne ke enka dewe de wextê velgan o. Henî şar şino velgan. Yanî qurix verdê joy ra gama ke vejêno ma zanê ke henî wextê velgan o.

Hergû serre wextê velgan kalikê ma ena mesela ma rê gerrey keno. Badê enê xeberdayîşî ez wurişta we şîya min meskî, sane o kosereyê ma ardî banî ser. Verê joy kalikê min bi sîyda koserî meskî seqêna. Dima ra tay rûnê heywanî sûyna serdê sanî û sûyna meskî ra. Meskî wina bibî tûje, kalikê min vatê: “Ena meskî mûyanî ke darena we!”

A şewe hewn nêkewt çimanê min. Kalikê mino Bed ame vîrdê min. Min xo rê vatê gelo o çax kalikê ma hende serrî Yemen de mendo, qurix çinê bîyêne ka seyîn bizanayêne ke wext çi yo.

Ma a şewe kewtî mîyandê cayî û destê sibayî de hema roc nêvejyabi qîtala, kalikdê min vatê “Wurzêrê we, ma kewtî erey!” Ma o destê sibayî de hema şewe tarî bî şî milda Delaleke. Babê min velg meskî kerdê, kalikê min girzeyî giredayê û ma rokan (domanan) ke velg nayêne ro werê ser.