Wisifê Ma Dinyaya Xo Bedilnaye

WISIFÊ MA DINYAYA XO BEDILNAYE

MALMÎSANIJ

Pîla pîlana ke vanî na bî

Ti yê mergî nêbî

Ti Xizirê roja tenge

Ganfîdayê roja sîyaye bî

Rast a, ma bêbextîyê felekî zaf dîyî

La na

Na qet nêbî birako!

Qey leza mergî bî gidî?

Embazanê ma yê Grûba Xebate ya Vateyî ra Wisif Hêlinijî (Wisif Kaymakî), roja 16.10.2008 de, paytextê Fransa Parîs de, qezayêkê trafîkî de dinyaya xo bedilnaye.

Wisif, 03.12.1954 de, dewanê Pîranî ra Qelbîn de dadîya xo ra bibi. Gedeyîya (domanîya) ey, a dewe de vîyartibî. Panc serrî mektebo verên Qelbîn de wendbi. Dima, seba ke îmkanê keyeyê înan çin bî, o nêşawitbi mekteb. Ey, xo vero dabi piro şibi medreseyanê cîya-cîyayanê Kurdistanî de wendbi. Girewtişê îcazeyê (dîplomaya) medrese dima, reyna xo vero şibi paytextê Sûrîye, Şam. Uca lîse qedênayebî. Lîse ra pey şibi Misir, Unîversîteya El-Ezherî de, qisimê rojnamegerî (gazetecilik) qedênabi. Qahîre ra şibi Parîs û tezê xo yew unîversîteya Parîsî de nuştbi. Wisifî zaf baş bi erebkî û franskî zanaynî.

O kurdperwerêko xurt, merdimêko erjaye bi. Merdimêko mutewazî, comerd û maqul. Seba milet û welatê xo, ziwanê xo zaf fedakar bi. Yeno vîrê mi, wexto ke mi o dawetê Kombîyayîşanê Kirmanckî kerdbi, zaf keyfweş bibi û ca de amebi. Dima, o yewendes Kombîyayîşanê Kirmanckî de amade bi. Seba ke nê serranê peyênan de boya ey weşe bî, hetê maddî ra zaf ardimê kovara Vateyî zî kerd.

Ey Kurdîstan de, Şam, Qahîre û Parîs de zaf feqîrî û tenganeyî dîbî. Heta yew deme Parîs de bêkar û bêpere mendbi, vêşan mendbi û nêweş kewtbi. Nê serranê peyênan rewşa ey a malî baş bîbî labelê ey feqîrîya xo, merdimîya xo xo vîr ra nêkerdibî; zaf kurdanê bêçareyan rê ardim kerdbi.

Wefatê ey ra pey, xebera wefatê ey gelek keyepelanê (homepage) kurdan -sey Vateonline, Netkurd, Rizgarionline- de vila bîye. Keyepelê Netkurdî de seba ey defterêk abi. Gelek nas û dostanê ey û kurdanê welatperweran uca de, derheqê ey de, hîs û fikrê xo nuştî.

23.10.2008 de ma, embazanê Buroyê Vateyî yê Dîyarbekirî û gelek nas û dostan pîya, da-sey taksî û mînîbuse reyra cenazeya Wisifî berde dewa ey Qelbîn, uca wedarite.

Wa ruhê ey şa bo.(*)

(*)Çime: Vate, hûmare: 32, r. 4-5