Xeyal

Qado her roje şîyê a herund de vinderdê û zîq wînîyayê. Rojê, di rojî, hîrê rojî… Heman saete de.

Embazê ke volta de wînîyayê ci ra, xo bi xo vatê “De çîyê nêbeno. Embaz newe ameyo hepisxane. Qey bêrîya teberî kerda. Bê lome bo…”

A roje fina heman saete de bi çinayanê neweyan a, bi postalanê neweyan a Qado fina a qunce de vinderdbî. Sîdar volta ra abirîya û şi ci hete. Wînîya pira ke Qado yo zîq wînîyeno, qet mijanganê xo zî pêro nêdano. Sîdarî zî pozîsyonê ey girewt û wînîya azmên ra. Xeylekî bi dîqat wînîya, tepîya vat “Embaz Qado! Ti ya wînîyenê çiçî ra, çimê mi? Ez hendayê wînîyaya, mi çîyê nêdî!”

Qadoyî bi vengêndo nizm a vat “Şşşş! Vindi!”

Xeylekî mend, tepîya Qadoyî keserêk ant û vat “Ooof of! Ewro zî nêame.”

Sîdarî vat “Çiçî nêame? Embaz Qado, rewşa to rind a?”

Qadoyî vat “Soz bidi ke ti do kesî ra nêvajî, ez to rê zî vaja.”

Sîdarî vat “Ti solê xo ra vanî. Meraq meki. Ti mi rê vaje, seke ti nê hepisxaneyî pêro nêvajî.”

Qadoyî vat “Temam. Embazê Bahozî mi ra vat û ez daya sond ro ke ez kesî ra nêvaja.”

Sîdarî vat “Temam. Ez zî sond wanena.”

Qadoyî vat, “Cezayê to zî vêşî yo. Ti zî bizanî rind beno. Embazê Bahozî vat, Her serre de finê, na saete de hewa ra balonên a ki perena yena, hepisî ser o vindena, şerît û resenî vera dana cêr. Kam ki hadre bo, çinayê neweyî pira bê û xo amade bikero, ey qebul kenê û bi şerît û resenan a ey ancenê cor, hepis ra remnenê benê.”

Sîdarî vat “Kê to ra vat?”

Qadoyî vat “Bahozî vat.”

Sîdarî vat “Ti qandê coy her roje heman saete de yenê tîya, saetê pawenê?”

Qadoyî vat “Erê. Ez do tim bipawa.” (*)

Hepisxaneyê Elbistanî, 19 êlule 2011

______________

(*) No nuşte “Newepel, Rojnameyo kulturî yo 15 roje, Hûmare 16, Dîyarbekir 01-15 teşrîne 2011, r. 7” de weşanîyayo.