Zengelonya

Ti pironayîşê tarîxî ra ver

Wextê wexton ra resaya heta wita

Ti xorînîya zerrî mîyon de nimita bîya

Edetê hinzar serron to ser o

To kaş kerdêne zeredê xo

Cuya to binê lingon de

Û ti resaya inê demê atomî

Hesîrê to rişîyaynê, pirrî gonî

Îna kula to ya bêdaru

Çimê to asmîn

Lîlaw

Porê to xeleyê Herranî

Gijgal

Weşîya to mîyonê cemedî de ya

Mela edetî yîne şirê binê ardî!

Ti newe zaclon bîya kuhodê wesarî ra

Wexto ke vilê to rişîyaynê

Ûmênê bi hiş fermonê to

Gula milvista Zengelonya.

Weşîya rîyê to herra bê awi

Lete-lete şeqilon de gêrenê

Gormarê wextê circirikon o

Tebax

Û yewe ra hinzar dono ard Zengelonya.

Ti kure ra bizona a gedeyîya xo ra

Însafê vergî esto leyîrê haroşê tepîşteyî rê?

Mela şirê binê ardî

Edetî

Ê ke dindononê xo pêsawenê

Bêmerhemetî

Tepşenê binê qirriki

Leyîronê xo wenê

Zûrî ra hesiro rişnenê

Û kendirê namerdimîye dekenê mildê to

Sewtê to birnenê

Zonê to qefelnenê

De vaci Zengelonya

Ti kure ra bizona?

To zozanonê Koyê Sipî ra

Vengê zerra xo eşkera kardêne

Taseki rê, nefeli rê

Padûseki rê, guli rê

Gula veyveki rê û sungi rê

Mem û Zîne veng dayêne to

Erdeşîr û Rustemê Zalî leweyî Araratî ra

Kawayê Asinkar Qoma Keynaya Qiralî ra

Ti kure ra bizona

Wextê kîlono yew boya weşi yena

Garmine kena geş

Ti ê wextî mîyon de bîya

Ti çi bizona hewna ardê to ser o cemed

Şeqilê cemedinî donê qarsi

Hewna zî to kesî ra nêvatêne heskerdişê xo

To xorînîya zerrî de nimitibî

To heskerdişê xo resna ca heya peynî

Heskardişê serê Koyê Sipîyî to ser o akewtbi

Hişî xo vîn kerdibî Mişraqî

Dûrî ra temaşeyî to kardêne

Wexto ke vayê koyî reyra têşonaynê Condila

O wext zerreyî qerefîyaynê

Çimê yê rayê Xizikî

Zerrîya to

To de nêmendêne

Ceremoyê Nemrûdî

Hewrêsê Koyê Sipî

Heskerdişê Sîpanî

Hîrayîya Herranî

Vengonê şima teberdê veyşanî

Dor qelebnenê

Heskerdişê zerrîya to Xemil

Şîyênê gole mîyon ûmêne awki

Û şahid bi Pîro

Dindonî pêsawitê

Dome ronaynê, jehr rijnayêne

Xo vîr meya

Xo vîr meya kendirê xozî

Çimê to asmîn

Zelal

Porê to xeleyê deşte

Têrokerde

Rîyê to gula vêveki

Veng yeno to Zengelonya?*

__________

Na şîîre “Newepel, Rojnameyo kulturî yo 15 roje, Hûmare 26, Dîyarbekir 15-31 adare 2012, r. 8” de weşanîyayo.