Zulkîf Ozel Ame Yad Kerdene

Şorişger û kurdperwer Zulkîf Ozel bi munasebetê serrgêra yewine ya wefatê xo, ewro saete 10.30 de hetê ferdanê keyeyê ey û grûbêk kurdperan ra dewa Himbêlî ya Pîranî de serê gorra xo de ame yad kerdene.

Grûbêk dost û embazê şorişger û kurdperwer Zulkîf Ozelî, cinî û tutê ey, bira û merdimê ey ewro saete 09:30 de Dîyarbekir ra kewtîy rayîr. Badê ke grûbe goristanê dewa Himbêlî de kom bîy, heme têreyra şîy serê gorra Zulkîf Ozelî.

Badê ke seba ruhê ey û heme şehîdanê doza Kurdîstanî fatîha amey wendene, dima embazanê ey ra Hesen Çakirî nameyê grûba kurdperweran ser o bi kurdkî (kirmanckî, kirdkî, zazakî, dimilkî) qisey kerd.

Hesen Çakirî qiseykerdişê xo de va: “Mamosta Zulkîf xebatkarêkê doza kurd û Kurdîstanî bi. Seba ke neteweya kurdan azad bo û Kurdîstan zî xoserbîyaye bo, xortanîya xo de beşdarê Têwgera Kurdîstanê Bakurî bi. Ey caran fek xebata xo ya kurdperwerîye ra veranêda. Mîyanê têwgera Kurdîstanî de bi her hawayî xebatî kerdîy.”

Hesen Çakirî qiseykerdişê xo wina dewam kerd: “Ey zindanê Dîyarbekirî yo namedar de xo ver ro da û tu sirrêkê xo nêda îşkencekaran, embazê xo pawitîy û bi risipêneyî zîndan ra vejîya teber.” Dima wina dewam kerd: “Mamosta Zulkîf, seba ke lehçeyanê kurdkî ra kirmanckî (zazakî) aver şiro, çend embazê eyê ke nika ha tîya serê gorra ey de, înan têreyde dest bi xebata ronayîşê komeleyêk kerd. La çi heyf ke ey leze dinyaya xo bedilna. Labelê ma zaf keyfweş ê ke a komele ey dima awan bîye û dest bi xebate kerd.”

Embazê mamosta Zulkîfî Seîd Aydogmuşî zî va: “Ma bi her hawayî kêmanîya ey hîs kenê û ey anê vîrê xo. La xebata mamosta Zulkîfî dewam kena. O zerrîya ma de ciwîyeno. Wa sereyê şarê kurdî, keye û embazanê ey weş bo.”

Peynî de dost û embazanê ey cinî, tutî û merdimanê ey ra xatir waşt. Ferdanê keyeyê Zulkîf Ozelî û merdimanê ey hemîne seba qedirşinasîya dost û embazanê ey zerrweşîya xo îfade kerde.