Rojnameyo yewin o safî bi Zazakî Newepel 15 adar 2011 de Diyarbekir de dest bi weşane kerd. Heta hûmara 50. pancês rojan ra reyêk, hûmara 51. ra pey aşme ra reyêk vejîya. Hezîran 2017 de resa hûmara 100ine û weşana xwu vindarna.
Rojnameyê Newepelî semedê wendoxan û nuştoxanê Zazakî sey mektebî bi; 61 cinî, 300 camêrd, nuşteyê 361 kesan tede weşanîyayê. Nînan ra nuşteyê 44 kesan yan neqil biyê yan zî tercume yê. Înanê bînan raşteraşt Newepelî rê nuşto. Nînan ra zî 250 ra vêşêr kesan reya verîne Newepel de dest bi nuştiş kerdo. Bi seyan merdimî zî Newepelî dir mûsayî wendişê Zazakî. Înanê ke Newepel de dest bi nuştiş kerd ra dapancas kesî, dima her yewî kitabêk yan çend kitabî weşanîyayê. Qismêko muhîm zî unîversîteyan de master û doktora kerde.
100 hûmaranê Newepelî de 44 hîkayeyî, 341 şîîrî, 319 xeberî, 319 nuşteyê derheqê ziwanî de, 590 nuşteyê muxtelifî û meqaleyî, 81 estanikî, 137 meselayî, 67 roportajî, 32 kayê domanan, 49 fiqrayî, 53 deyîrî, 6 nuşteyê cigêrayişî, 34 mesajî, 42 tarîfê werdî û gelêk nuşteyê bînî yê sey mewlidî, efsaneyî, çibenokî, mamikî, lorîgî, îdyomî, vateyê verênan, miqlatikî, lezvateyî, karîkatur û fotografî weşanîyayê.
