Nehaya Dewe

Vanê, yew dewe de keynayêka zaf rindeki bena. Lajê mîreyê Palî bi salixê merdimanî xo, rindîya na keyna eşnaweno û şino vîneno. Keyna ey çiman di sey rojî çuriskîyena. Bena aşma çarêsşewîye, rindîya aye ver di dor û dormaleyî heme çî vîn benê. Lajek hende ke beno aşiq, hard û asmên çimanî ey ver ro vîn bene, her çî beno rindîya keyna.

Keyna xo tewr bişanse hesibnena, seba ke keyeyo xerabe ra bixelîsîyo û feqîrîye ra dûrî biko û şiro qesr û qonaxanê dewlemendan de ronişo, nê zewacî rê her dem amede bî.

Demo kilmek de veyve ronîya. Veyveyî çawres roj û şewî ramit. Keyna xo bi xo vajîya va: “Ez çi bibext a. Yew dewij bîya. Nika bena veyva mîreyî û qesre de ronişena, hila hila!”

La nê zewacî ra pey, keynaya dewije zaf vurîya. Ciwîyayişê xo yê dewe vîr ra kerd. A xizanî û feqîrî ra na dewlemendîye dî. Xo ra cor kes nêşinasna, hendêk bîye qure, tenezul ra keye de çewt û rast nêbîyêne.

Çend serran ra pey menga nîsan a. Koyî hima vewre ra belekin ê. Wextê kengeran o. A roje, daya keyneke epey kengerî çînitbî. Kengerê rindî weçînay û vengda babîyê keyna û vat:

- Ti zanî. Keyna ma kengeran ra zaf hes kena. Nînan aye rê berê.

Babîyê keyna, torbeyê kengeran erzeno xo çele û kuweno raye. Bi kelecan o. Çimki hêdî nêzdîyê qesrê keynaya xo de yo. Keyna zî şebake ra babîyê xo vînena. Kincêkê dirnaye û lîşinî peradaye yê. Çend bê zerrî bo zî şina vernî û lew nana destanê babîyê xo ra. Halê yewbînî persenê. Kenya vana:

- Ti bi xeyr ameyê. Sebebê ameyîşî to çî yo?

Babîyê aye vano:

- Ti kengeran ra zaf hes kena. Maya to kengerî çînitî. Nê weçînay to rê erşawitî.

Keyna bi hêrs vana:

- Lo babo, kenger yeno mîyanê kaşan, werî heran û cehşan.

Kenger nê keyî de çi geyreno, qonaxê mîr û paşan?

Nê qisan ser o mêriko feqîrek mitûmat maneno. Şermayeno beno sûr û çirr. Kerdinê xo ra zaf poşman beno. Ahwa cewab dano:

- Wey keynaya min a malmîrati, ti neheyêka dewe bîya, lewîyaya bi şeker ra, bîya berbati. Wax, wax! Ti bîya leblebîya zaf-fîyati.

Babî bi vaj-vaj peynîya qisaya xo ano. Bi zerveşaye vano:

- Ez ha geyrena torbeyê xo, ez ko şirî keyeyê xo. Na quretîya ki ti kena, heran û cahşan de qet çinî ya!