PÎRE Û PISÎNGI

Beno çinê beno, yew pîre û pisîngi benî. Yew zî mongayê pîri bena. Nameyê ya Ede bena. Pîre rocêk şina mangayê xwu çir kena (doşena), şitê xwu ana girênena, ûmîn (maye) kena, neqeb nana sêr quşxanî, vana wa bibo mast. Pisîngi şina ayê şitî şimena. Pîre roca bîne şina ewnîyena şit çîn o. Vendena pisîngi vana:

- Pişê to şitê mi şimito?

Pisîngi vana:

- Nê! Mi nêşimito.

Roca bîne pîre reyna şina Ede çir kena, şit ana ûmîn kena, neqeb nana sêr quşxanî, vana wa bibo mast. Pisîngi ancî şina şitî şimena. Pîre roca bîne şina ewnîyena reyna şit çin o, quşxane vikî-veng o. Vendena pisîngi vana:

- Pişê to şitê mi şimit?

Pisîngi vana:

- Nê! Mi nêşimit.

Pîre roca hîrêyîni zî şina Ede çir kena, şit ana ûmîn kena, neqeb dana sêr quşxanî vana, wa bibo mast. Pisîngi reyna nêvindena dana piro şina şit şimena. Beno sêr sibayî, pîre şina ewnîyena ki ha-ho! Quşxane reyna vikî-veng o. Vendena pisîngi, pers kena (persena) vana:

- Pişê to şitê mi şimito?

Pisîngi ena paş vana:

- E! Mi şimito.

Pîre vana:

- De şo mi rê yew darey bîyari.

Pisîngi şina darey ana dana pîre. Pîre vana:

- De peyê xo tade mi.

Pisîngi peyê xo tadana hetê pîre ya, pîre darey dana boça pisîngi re, boça ya dira (ci ra) kena.

Yew waxt dima keyê xale pisîngi veyve ronenî. Erşawenî pisîngi dima vanî ­­“bê veyve”.

Pisîngi xo bi xo vana:

- Ez bê boçe çawa şêra veyve!

Dana piro şina pîre het, vana:

- Pîrê, keyê xalê mi erşawuto mi dima veyve. Ez bê boçe senî şêro? De boça mi bide ez şêra keyeyî xalî veyve.

Pîre vana:

- Şitê mi bîya ez do boça to bida.

Pisîngi şina Ede het, vana:

- Edê Edê! Şit bide mi, ez bera bida pîre. Pîre wa boça mi bido, ez şêra keyeyî xaloyî veyve. Ede vana:

- Vaş bide mi.

Pisîngi şina merge ra vana:

- Mergê mergê, vaş bide mi, ez bera bida Ede. Wa Ede şit bido mi, ez bera bida pîre, wa pîre boça mi bido, ez şêra keyeyî xaloyî veyve.

Merge vana:

- Awe bide mi.

Pisîngi şina ênî ser vana:

- Ênî ênî, awe bide mi, ez bera bida merge. Wa merge vaş bido mi, ez bera bida Ede. Wa Ede şit bido mi, ez bera bida pîre, wa pîre boça mi bido, ez şêra keyeyî xaloyî veyve.

Ênî vano:

- Wa Canane, Fırat, Yekta, Nukete, Rojene bêrî mi ser de kay bikî, ez awe bida to.

Pisîngi şina înan ra vana, ê zî vanî:

- Ma ri solanê sûran bîyare, ma bikî xo pay, hama ma şêrî serê ênî de kay bikî.

Pisîngi şina Ehmedî Dayê (solderzo keyê Kîzîro ra yo) het, vana:

- Ehmêd Dayê, Ehmêd Dayê, gedeyan rî solanê sûran biderzi, ez bera bida înan, wa şêrî ênî ser o kay bikî. Wa ênî awe bido mi, ez bera bida merge. Merge vaş bido mi, ez bera bida Ede. Wa Ede şit bido mi, ez bera bida pîre. Pîre boça mi bido, ez şêra keyeyê xaloyî veyve.

Ehmêd Dayê vano:

- Mi rê hakan bîyare.

Pisîngi şina kerge het, vana:

- Kergê kergê, hakan bide mi, ez bera bida Ehmêd Dayê. Wa Ehmêd Dayê solanê sûran  biderzo, ez bera bida gedeyan. Gedeyî şêrî serê ênî de kay bikî. Wa ênî awe bido mi, ez bera bida merge. Merge vaş bido mi, ez bera bida Ede. Wa Ede şit bido mi, ez bera bida pîre. Pîre boça mi bido, ez şêra keyeyê xaloyî veyve.

Kerge vana:

- Mi rê qut biyare.

Pisîngi şina karû (kuwarî) het, vana:

- Karû karû, binêk qut bide mi, ez bera bida kerge. Kerge hakan bido mi, ez bera bida Ehmêd Dayê. Wa ew zî solanê sûran biderzo, bido mi, ez bera bida gedeyan. Wa gedeyî şêrî serî ênî di kay bikî. Ênî awe bido mi, ez awe bera bida merge. Merge vaş bido mi, ez vaş bera bida Ede. Wa Ede şit bido mi, ez bera bida pîre. Wa pîre boça mi bido ez şêra keyeyê xaloyî veyve. Karû vano:

- Wa bo! Ez dana.

Pisîng karû ra qut gêna bena dana kerge, kerge ra hakan gêna bena dana Ehmêd Dayê, êy ra solanê sûran gêna bena dana Canane, Fıratî, Yekta, Nukete, Felatî û Rojene. Êy şinî ênî ser di kay kenî. Ênî awe dano. Pisîngi awe bena dana merge. Merge ra vaş gêna bena dana Ede. Ede ra şit gêna bena dana pîre. Pîre ra boça xo gêna şina keyeyê xaloyî veyve.

Estanekê ma tîya de qedêna û Rojen şina hewn ra.(*)

________________

(*) Na sanike “Newepel, Rojnameyo kulturî, Hûmare 54, Dîyarbekir, Tebaxe 2013, r. 6” de weşanîyaya.

Mintiqa: Hêni