Sanika Koremare

Waxto ke Koremore ama rîyê dîna, wayîrê dîna kemera almoştî daybî ci ke eke bîyê vêsane, xo rê şêro roştîya daye de biçero. Koremore, nameyê xo ser o yo, kor a. Peroz kuna ra, pesewe fetelîna. Vanê, korênîya Koremore roştîya tîjî ra bîya. Koremore tarî û zilemote de vînena. Eke bî tarî, bena teber sona. Cayo vasin kena saye, vînena. Binê zonê xo ra kemera almoştî vezena. Roştîya kemera almoştî de çerena.

Mordemê ke bêro, rastê Koremore bo,  çewt bo, kemera aye bicêro, vozdo, şêro, xo bierzo peyê hewt koyû, Koremore sona, ey kena saye, peyê hewt koyû de vînena, kemera xo ci ra cêna. Koremore eke raya xo ser a dar û birr ra, kemer û kuç ra, mirçike û nêzan, çikî û çinayî ra, eke çîyê pers kero, ko, birr, kemere, mirçikî... pêro yenê ra zon, cewab danê ci.

Rocû ra rocê, Koremore roştîya kemera almaştî de çerena. Aye de di mordemî raye ra vêrenê ra.

Xafil de benê kemera almaştî ro, darenê we benê. Koremore tarîye de, alanga şîyaye de manena. Nata perrena, bota perrena, raştê dare yena, raştê kemere yena. Pers kena dar û kemere ra, vana:

 - Di mordemû roştîya çimanê mi berde, kemera min a almaştî berde. Kata şîy, yamû yamû, mi ra vacê!

Kemere be dare ra sas benê. Vanê:

- Di mordemî amey, hetê çemî ser şîy. Besekena, so, çem de awe ra pers ke. Bibo, nêbo, awe

zanena.

Koremore dima hata fekê çemî sona. Awe ra pers kena, vana:

- Di mordemû roştîya mi tirte. Tawa ame, îta ra vêrdî ra, ranêvêrdî?

Awe vana:

- Ti kamcî awe ra pers kena? Key amey, şîy?

Koremore vana:

- To ra pers ken. Helmê naye ra ravê amey, şîy.

Awe oncîa vana:

- O ra dime çand awî na dere de vêrdî ra, ti zanena? Ti kamcî awe ra pers kena?

Koremore sas bena. Vana:

- Qey, ti ju awe nîya ke? Çand awî na dere de vêrenê ra ke ti nêzanena?

Awe vana:

- Ju awe de ju gêyîm vêrenê ra.

Koremore sas bena. Xo xo de vana: “Ala qayît ke... Ju awe de ju gêyîm vêrenê ra! Kemere a kemer a, dare a dar a, awe çira a awe nîya?”

Koremore kor û posman nata bota yena, sona. Wertê pers û cewabû de bena sasxûne, manena.

Hata ke famê xo şêro na cewabû ser ke peyê kortika xo vînena. Nêçe awî derû de têdima pêl danê, sonê...  (*)

___________

(*) Na sanike hetê Pilemurîye de yena vatene. Tîya tena yew varyant nusîyayo. Seba varyantêna biewnîyêne: Cengîz, Daîmî, Dersim Fablları, Kalan Yayınları, Anqara, temmuze 2001