Şanika Pepûgî

Zemanê, ju dewe de waye û birayê xo benê. Maya înan mirena nê seyî manenê. Maye ke mirena zemanê maneno pîyê nîna zewejîno, ju dêmarîye ano nîna ser. Ê na cinîke jî di domanê xo benê. Dêmarîye nê domana ra hes nikena, sade domananê xo ra hes kena. Qaytê nê domana nikena, vêşan verdana, têşan verdana. Teyna domananê xo ra wayîr vejîna. 

Ortê ra xeylê waxt derbaz beno. Rojê dêmarîya nê domana ra vana:

- Anê tûrikî bicerê şorê ma rê kengera bîyarê.

Tabî nê waye û bira dêmarîya xo ra zaf tersenê, çîyê nivanê, vile xo kenê çewt, tûrikê xo, kardîya xo û zengenê xo cênê teknenê şonê kengera.

Nê teknenê şonê, tabî na dêmarîya nîna dizdîya nîna binê tûrikî dirnena, kena qule. Xebera nîna jî çîn a.

Şonê, birawo qij tûrikî erzeno vile xo na çêneke jî kengera çînena dana birayê xo. Xeylê waxt cêrenê xeylê kengera danê arê.

Xeylê waxt fetelîne kengera danê arê, birawo qij waya xo ra ju kenger wazeno vano:

- Waye ju kenger bide mi ez xo rê burî.

Na jî ju cêno kena pak dana bîrayê xo, ju kenger jî a bi xo wena.

Xeylê waxt not-bota fetelînê, kengera danê arê. Na çêneke kengera çînena dana birayê xo, o kî ju bi ju cêno erzeno zere tûrîkî. Xeylê ke danê arê, birawo qij vano:

- Wakilê, ez zaf qefelîyo ma tayê bîna xo bicerî me.

Cayê de nîşenê ro, şopê bîna xo cênê. O waxt waye qaytê zerê tûrikî kena ke  tûrik tipûtal o. Na vana:

- Bira qa mi hondê kengerî çînîtî nê kotî yê? To nê kengerî kulî werdî, se kerdî? Nika ke ma şîme çê dêmarîya ma, ma wena.

O jî vano:

- Waye Xizir bo mi niwerdê. Hes kena zere mi yaqilaşne ju kenger to do mi, mi o werdo. Êndî ju o wo, mi tawa kengerî niwerdê.

Bira se keno-nikeno waye înamê birayê xo nikena. Salade pane ser a meridnena ra, kardî cêna zerê birayê xo qilaşnena ya ke, heya, ju kengero ke aye do ci tenya o.

Tabî bira mireno. Na dano xo ra, berbena, zîbena, porê xo ruçiknena êndî çarê nivînena cêrena Heqî ver vana:

- Heqo ma se beno to mi teyre ke, ez hebê nê janî bifetelî, tim vajî; "pepo-keko, pepo-keko"

Heq duayanê naye qebul keno, naye keno teyre na kuna ra çol û çolistana.

Waxto ke beno wisar, kengerî ke resenê, na êndî wanena vana:

"Pepo keko

 Kamî kîşt

 Mi kîşt,

 Kamî şut

 Mi şut,

 Pepo keko

 Kamî kinit

 Mi kinit.”

Vanê a roje ra dime na xo rê kuna çol û çolistana. Waxto ke beno hamnan na ca bi ca cêrêna derdê xo rê wanena heyan ke kengerî bî huşk. (*)

 _________________

(*) Na sanike Gimgim ra Dewa Zengena (Mezra Pitika) ra Amoja Axçe (Ahçan Güzelçay), roja 10.03.2009î de, Taxa Gazî ya Îstanbulî de mi rê vate.