SÎTILO KIHAN

Jew xo rê tim di sitîlan a şino îni ra awe ano keye. Jew sîtilêndê ci bîyo kihan û qule. Her roj şino awe ano qandê keyî la hetana resneno keye sitildê kihanî ra awe çilkî kena. Yeno keye ke nîmeyê awe zî nêmenda. Ney ra aseno, kişta ray ra tim û tim ê sîtilî keno xo dest. Rojê no sîtil yeno ziwan, vano: 

- Ti qisûrdê mi nêwinyê, ez a bol qehrêna. Ti yê her roj ma ya şinê awe la hetana keyê hende ray yenê, mi de awa nêmanena, mi hinî çeke, ez tebay rê nêbena, zehmeto bîlaheq dana to, şo xo rê jewna sîtil bigî, ey a şo awe bikirêşi.

Mêrdek winêno pira, beno abeş. Vano:

- Kê vato, ez a to bîlaheq bena awe, kê vato, ti tebay rê nêbenê?

Mêrdek dewam keno vano:

- Hadê ma fina şirê, bewnî ti tebay rê benê ya nêbenê?

Sîtilanê xo gêno û şino fina îni ra keno pirê awe, wegêno û ano, sîtil hatîla zey serradî çilkî keno. Sîtil fina vano:

- Mi tîya verde, şo bîlaheq min a încirax mebe.

Mêrdek vano:

- Hele bewnî xo dûşne, bewnî to ra çiçî aseno!

Mêrdek vano:

- No xeyrdê to wina bîyo, bewnî to çiçî resnayo, bewnî çi gul û vilikî dar û ber to kerdo kiho. No pêro çilkandê to ya wina bîyo, to ke çilkî nêkerdê, kê do no çî awedayê? Mi dî ti yê çilkî kenê, mi zî va, no wina nêbeno, mi zî ti tim a kişta tepiştê û wija tim bi kiho. Vaş û çayîr rûwa, gul û vilikî resay, mi zî darî ronay, her fina ke mi ti ardî, mexsedê mi to ya awe keye resnayiş nêbî, to ya ê çî awdayiş bî, na pêro şopa to ya. Heywanî, însanî, teyr û tûr pêro xeyrdê to nê çî ra nehfet vînenê, ti senî tebay rê nêbenê? Nehfetê to bol o, ti ercîyaye yê, naye rind bizan. Tî yê çilkî kenê, deyi ez to nêçekena, ti bol lazim ê.

Sîtil bol kêf keno, beno şa.

Na hîkayedê ma ra rind fehm beno ke çî teneyê bi kihan kes do nêçekero, îlla çîyê rê beno.

__________

YASAL UYARI: www.zazaki.net kaynağında yayınlanmış herhangi bir haber, yazı veya fotoğrafın site editöründen izin alınmadan olduğu gibi kopyalanarak ya da üzerinde çeşitli oynamalar yapılarak herhangi bir yerde yayınlanması; farklı çalışmalarda alıntı olarak kullanmak amacıyla cümle veya paragrafların kopyalanmasında ise standart bir şekilde kaynak belirtilmemesi durumunda hukuki süreç başlatılacaktır!