ZIWAN-KOM HETKARÊ REFERANDUMÎ YO

Komela Ziwan Huner û Kulturî (Ziwan-Kom) ke seba pawitiş, averberdiş û aktuelkerdişê kirdî 2010 de Diyarbekir de awan bîya û heta ewro bi hawayêko aktîf karê xwu dewam kena, roja 10.09.2017 de kom bîye. Kombîyayiş de qerar da ke seba referandumê 25 êlule bi hawayêko aktîf hetkar bo.

Komela Ziwan-Komî ena bawerîye de ya, mileto bêdewlet mîyanê miletan de bêname yo, çinê hesab beno. Ma kurdî gereka rewna ra bibîyêne wayîrê dewlete, la çi heyf ke heta ewro ma bêdewlet mendê. Coka referandumo ke Kurdistanê Başûrî de beno tena semedê parçeyêk ney, esas seba heme kurdan firsendêko pîl o. Referandumê xwuserîye hetê huqûqê mîyanneteweyî ra zî heqêko meşrû yo. Ganî her kes hem qerarê referandumî rê hem zî netîceyê ey rê hurmetkar bo.

Ma sey komela Ziwan-Komî seba referandumê ke Kurdistanê Başûrî de beno zerrî ra hetkarî kenê û ma hêvî kenê referandum serkewte bivîyaro, seba dewletbiyayişî bibo gama tewr xurte.

Diyarbekir, 11.09.2017

Komela Ziwan Huner û Kulturî

(ZIWAN-KOM)