Hîrê logoyê ma

Sembolo ke semedê yew muesese, yew ticaretxaneyî, yew dezgeyî, yew teşkîlatî yan zî yew weşanî, ma vajê semedê yew rojnameyî yan kovare xisûsî yeno viraştiş ra vanê “logo”. Ma ena kelîme Tirkî ra şinawita, tirkan Înglîzî ra girewta, înglîzan zî kelîmeya Grekî “lόgos” ra girewta.

Ez eno nuşte de behsê hîrê logoyanê ke ma xebata xwu ya ziwanî de bikar anê kena: 1.logoyê komeleya Ziwan-Komî, 2.logoyê Weşanxaneyê Roşna û 3.logoyê keyepelê Zazakî.Netî.

Awanîya her logoyî, yanî kombînasyono ke tema, reng, slogan, karakter, şekil û bîçimê her logoyî karakterîze keno, taybetîyê karakterîstîk yê weşan, dezge, muesese yan zî teşkîlatî nîşan dano. Mesela, enê her hîrê logoyê ma bi tema û rengê xwu, bi bîçim û şeklê xwu, bi karakter û awanîya xwu, bi sloganê xwu karakterê xebata ma nîşan danê. Ma vajê, rengo zerd ke roşnayî temsîl keno her hîrê logoyanê ma de rengo sereke yo. Zerd, neke tenya roşnayî sembolîze keno, eynî wext de tîmsalê zindetî, bextewarî, enerjî û îstîqrarî yo; rengo zerd enerjîyo pozîtîf vila keno û enerjîyê merdimî zêdneno, ruhîyetê merdimî zinde keno, moralê merdimî berz keno…

1.Logoyê Ziwan-Komî; wexto ke ma serra 2010 de lebetîyayne ke ena komele ronê, program û nîzamnameyê komele mi nuştî, nameyê ci zî mi rona. Logoyê ci mi tesewur kerd la mi hevalê xwu yo ercaye resamo kurd Serhad Bapirî ra rica kerd, ey zî ez nêşikita, bi eno qeyde yew resimo orîjînal viraşt. Serhad Bapîr kurmanc o, 1964 de Tetwan de ameyo dinya. Serra 1984 de sey miltecîyo kurd o siyasî Yûnanîstan de îltîca kerda. Uca unîversîte wenda û Selanîk de sey mialimê dersa resimî mektebo miyanîn de tayin biyo. O wext ra nat Yûnanîstan de cûyeno. Resimê qapaxê kitabê mi Gotin Diçe Nivîs Dimîne zî kek Serhadî viraşt. Ez ey rê zaf zaf sipas kena, keyeyê ci awan bo.

2.Logoyê Weşanxaneyê Roşna; wexto ke serra 2012 de ma eno weşanxane rona, ma xwu rê yew logoyo basît viraştbi. O logo gelek kitabanê Weşanxaneyê Roşna ser o esto. La serra 2018 de kek Îbrahîm Xelîl Baranî eno logo semedê Weşanxaneyê Roşna viraşt. Bêke xebera mi ci ra bibo, ey xwuvero eno logo viraşt û mi rê şirawit. A roje ra nat ma enê logoyî bikar anê. Îbrahîm Xelîl Baran kurmanc o, 1981 de Ruha de ameyo dinya. Fealîyetanê xwu yê siyasî ver ame tepiştiş û hepisxane de mend. Serra 2021 de Tirkîye ra vejîya. Nika sey miltecîyo siyasî Almanya de maneno. Îbrahîm Xelîl Baranî qapaxê gelek kitabanê ke Weşanxaneyê Roşna ra weşanîyayê zî viraştê. Ez ey rê zaf sipas kena, keyeyê ci awan bo.

3.Logoyê keyepelê Zazakî.Netî; wexto ke serra 2009 de keyepelê Zazakî.Netî dest bi weşane kerd, ma sloganê “Merdim bi reng û vengê xwu rindek o” dir yew logoyo basît viraştbi. La emser gama ke ma keyepel newe kerd, ma logo û sloganê ci zî bedelnayî. Sloganê “Her kes mîmarê dîwarê xwu yo” mi beyta berceste ya şahê edebîyatê ma Ehmedê Xanî ke vano “Vî zemanî her kesêk mî’marê dîwarê xwe ye” ra girewt. Şekil û rengê logoyî zî mi tesewur kerd la dîzaynê ci, hevalê min o ercaye Azad Zalî kerd. Azad kurmanc o, 1972 de yew dewa Diyarbekirî de ameyo. Xebata xwu ya siyasî ver 1992 de gêrîya û diyes serrî zindan de mend. Serra 2011 ra nat weşangerî keno. Ez ey rê zaf zaf sipas kena, keyeyê ci awan bo.

Qismêko muhîm yê qapaxê kitabanê ke Weşanxaneyê Roşna ra weşanîyayê Dawud Özalpî û hevala ci Aysel xanime viraştê. Her di zî kurmanc ê, şarê Wanî yê. Ez her diyan rê zaf sipas kena, keyeyê înan awan bo. Qismêk qapaxê kitabanê ma zî hunermendo kurd o namdar Seywan Seîdîyanî viraştê. Seywan kurdanê ma yê mukrî ra şarê Mihabadî yo. Ez ey rê zaf sipas kena, keyeyê ci awan bo.

Seba ke ena paştgîrî, destek, ardim û qeweto ke enê hevalanê ercayan keremê zerrîya xwu ra dayo xebata ma ya ziwanî teqdîr bibo, mi waşt ez enê mehlûmatî tiya qeyd bikerî.