Mela Mehemedê Hezanî

Mela Mehemedê Hezanî 1938 de nehîyeya Licê Hezan de ameyo dinya. Babîyê ey Mela Ebdulxefûr melayê Hezanî biyo. Ey verê babîyê xwu de dest bi wendişê Erebî kerdo. Dima, gama ke serra 1949 de Hezan de reya verîne dewa înan de mekteb virazîyeno, ey zî eynî serre dest bi wendişê Tirkî kerdo. Badê ke panc serrî mektebo verîn temam kerdo, ena rey teberê Hezanî de dest bi wendişê medresa kerdo. Ewilî Diyarbekir de medreseya camîya Hezretî Umerî de verê Mela Evdisemedî de wendo. Dima, Licê de Mela Evdilayî het wendo. Badê pey zî medreseya dewanê sey Balicne, Metranî û Kengerlî de wendişê xwu dewam kerdo. Qederêk zî Bismil û Mêrdîn de wendo. Peynî de dewa Diyarbekirî Baroxlî de wendişê xwu temam kerdo û serra 1969 de dewa xwu Hezan de dest bi melatîya resmî kerda. Wezîfeyê xwu yê melatî sere ra heta ke serra 1992 de teqawut biyo, dewa xwu Hezan de kerda.

Mela Mehemedê Hezanî serra 1969 de bi Kurdî dest bi nuştişê şiîran kerdo. Ey reya verîne kitabê xwu Mecnûn û Leyla bi Kurmancî nuşto. Kitabê ey Eqîdetul Îmanî, verî bi Kurmancî serra 1980 de nuşto, dima bi Kirdî serra 1981 de nuşto û ey bi xwu enê her hîrê kitabê xwu metbea de çap kerdê. Ey enê kitabê xwu bi alfabeya Erebî nuştê.

Eserê eyê ke metbea de çap biyê enê yê:

1) Mecnûn û Leyla (Kurmancî), Diyarbekir, 1979, 54 r.

2) Eqîdetul Îmanî (Kurmancî), Diyarbekir, 1980, 27 r.

3) Eqîdetul Îmanî (Kirdî), Diyarbekir, 1981, 30 r.

Mela Mehemedê Hezanî

Resmê qapaxê kitabanê Mela Mehemedê Hezanî:

Mecnûn û Leyla (kurmanckî), Dîyarbekir, 1979, 54 r.

Eqîdetul Îmanî (kurmanckî), Dîyarbekir, 1980, 27 r.

Eqîdetul Îmanî (kirdkî), Dîyarbekir, 1981, 30 r.