Fîhrîstê 75 Hûmaranê Newepelî
Rojnameyo kulturî Newepel sey rojnameyo yewin o safî bi kirdkî roja 15 adare 2011 de dest bi weşana xo kerd. Hetanî hûmara 50. pancês rojan ra reyêk, na hûmara ra pey (nîsane 2013) aşme ra reyêk vejîyeno. Hûmara 75. ya Newepelî sey hûmara gulane 2015 vejîya.
75 hûmaranê Newepelî de 1610 nuşteyê muxtelîfî; şîîrî, hîkayeyê modernî, roportajî, arêdayeyê folklorîkî yê sey vateyê verênan, îdyom, mamikî, kayî, fiqrayî, sanikî, deyîrî, meselayî û lorîgî, ancî xeberî weşanîyayê.
75 hûmaranê Newepelî de nuşteyê 262 kesan weşanîyayê. Nînan ra nuşteyê 29 kesan yan neql bîyê yan zî tercume bîyê. 37 cinî 196 camêrd, 233 kesan rasetarst Newepelî rê nuşto. Nê 233 kesan ra zî teqrîben nêzdîyê di sey kesan reya verêne Newepel de dest bi nuştiş kerdo. Bi seyan kesî zî çarçewaya vilabîyayîşê Newepelî de wendişê kirdkî musayê.
Qismêko muhîm yê nuştoxanê Newepelî êdî daîmî nusenê. Nînan ra da-des kesî kitab yan kitabê înan weşanîyayê.
Newepel, çarçewaya xebata Komela Ziwan Huner û Kulturî (Ziwan-Kom) de vejîyeno. Na komele temmuza 2010î de Dîyarbekir de hetê grûbêk kurdperweran ra seba pawitiş, averberdiş û aktuelkerdişê kirdkî ronîyabî. Vetiş û vilakerdişê rojnameyê Newepelî de keda madî û manewî ya zaf kesan esta.
Fîhrîst de nuşteyê her hûmare bi hawayêko kronolojîk cîya-cîya ameyê rêzkerdiş. Nuşteyî zî, sere de nameyê nuştox yan nuştoxe (tercume, transkrîpsîyon, arêkerdox…) nusîyayo, dima sernameyê nuşteyî bi hawayêko îtalîk nusîyayo, kîşta sernameyî de mîyanê parantezî de tewirê nuşteyî nusîyayo, vajîme sey (nuşte, ziwan, şîîre, hîkaye, sanike ûsn), dima bi reqeme hûmara Newepelî ke nuşte tede weşanîyayo û badê nê îşaretî (/) zî rîpelê ke nuşte tede yo, nusîyayo.
Beşê diyin de, nuşteyê her hûmare goreyê rêza rîpelan ra rêz bîyê.
Beşê hîrêyin de zî lîsteya nuştoxan esta.
Şîrove Bike
Yewna rê bişawe 
Prînter Bike
Acor
