Hûmara 13. ya Şewçila Vejîya

Hûmara 13. ya kovara edebî hunerî Şewçila bi muhtewayêka dewlemende vejîya.

Na hûmare de resam Hêlîn Anter derheqê ekolê Empresyonîzmî de nuşteyêko dergo muhîm nuşto. Hêlîne bi nuşteyê xo yê bi sernameyê “Yew Dinyaya Newîye Yew Çimo Newe” de behsê vejîyayîşê meydanî yê ekolê Empresyonîzmî kena, tarîf û ferqê nê terzê bi metodanê verênan yê hunerê resmî nîşan dana. Ancî behs kena ke ekolê empresyonîzmî huneranê bînan ser o senî tesîr kerdo. Peynî de hunermendanê empresyonîstan yê verênan dana şinasnayîş. Na reya verên a ke bi kirdkî cigêrayîşêko wina hîra û xorîn hunerê resmî ser o beno.

Na hûmare de Sevîm Aydin yew roportaj Nadîre Güntaş Aldatmaz reyde kerdo. Nadîre roportajê xo de behsê cuya xo, bitaybetî zî behsê xebata xo ya nuştoxîye û hunerê hîkaye kena.

Na hûmare de di hîkayeyê tercumebîyayeyî estê. A verêne, hîkayeya nuştoxê armenî Avedîg Îsahagyanî ya. Hîkayeya bi nameyê “Budha” ke destpêkê seserra vîstine de nusîyaya, reya verêne Sarkîs Srentsî armenîkî ra tercumeyê osmanîkî kerda û Îstanbul de kovara Servet-i Fünun de weşanaya. Hîkayeya bîne zî edebîyatê tirkan ra bi nameyê xo yê orîjînal “Gaxan”î, yê Umran Düşünsele ya.

Yê kirdkî, hîkayeya bi nameyê “Şerab, Gilyazî û Mêrdîn” yê Roşan Lezgînî, hîkayeya bi nameyê “Halînê Zerence” yê Dilo Bargiranî, hîkayeya bi nameyê “Kutik”î yê Huseyîn Karakaşî, hîkayeya bi nameyê “Qeçekîya Xetîca” yê Necîbe Kırmızıgül,  hîkayeya bi nameyê “Kilîtê Wendegehî” yê Şeyda Asmîn û hîkayeya bi nameyê “Kilawe” zî yê Seyîdxan Kurijî ya.

Şîîrê na hûmare zî yê Mehdî Özsoy, Mihanî Licokic, Hemîd Hozan, M. Mamet Qetekonij, Hacer Petekkaya û yê Bedrîye Topaçe yê.

Ancî M. Mamet Qetekonijî kitabê hîkayeyan yê Seyîdxan Kurijî “Grev”î ser o yew nuşte nuşto.