HÛMARA 44. YA KOVARA VATEYÎ VEJÎYA

Hûmara 44. ya kovara Vateyî sey hûmara wisarî ya 2015î vejîya.

Nuşteyo ke Mehmed S. Kaya û Memo Darêzî tede prosesê standardîzekerdişê norveçkî û zazakî pêveronanê, sey dewamê nuşteyê hûmara 43., na hûmare de ca girewto û temam bîyo. No pêveronayîş keno ke ma perspektîvêko hîna hîra ra bala xo bidin xebata standardîzekerdişê kirdkî ser. Nuştoxî nuşteyê xo de pêşnîyaz kenê ke "Ziwanî nuştişî, tena yew dîyalekte ra nê, gerek bingeyî xo zaf dîyalektan ra bigêro û yew ortaxîya tewr hîra ya ke pêroyîyê şarî xo tede bivîno, xo rê bikero armanc."

Nuşteyanê balkêşan yê na hûmare ra yew roportajo ke J. Îhsan Esparî Pîran ra Xal Hesenê Cim'unî dir kerdo yo. Xal Hesen roportaj de fekê babîyê xo ra demê herbê kurdan û tirkan yê 1925î de behsê surgunbîyayîşê babîyê xo û tayê hevalanê ey keno. Peynîya roportajî de, lîsteya nameyê tayê pîranijanê ke Mehkemaya Îstîqlalî o wext derheqê înan de cezaya surgunî daya û ê surgun kerdê zî esta. Roportajo bîn zî Seyîdxan Kurijî resam Mehmud Celayîrî dir kerdo. Tîya ra ver zî yew roportajê înan kovara Vateyî de weşanîyabi.

Na hûmare de nuşteyanê muhîman ra yew zî yê Ehmedê Dirihî yo. Ehmedê Dirihî behsê hedîseyanê sîyasîyan yê serranê 1975î keno ke Xarpêt û Çewlîg de ameyê meydan. Hetê pêardişê hafizaya komelkî ra nuşteyê winasî muhîm ê.

Di nuşteyê Murad Canşadî na hûmare de estê. O verên derheqê sanika namdare ya kurdan "Alik û Fatike" de ya ke zemanêk Ziya Gökalpî na sanike bi nameyê "Ülker ile Aydın" tadaya tirkî ser û bi hîsanê tirkîstîye newe ra nuşta. Nuşteyo diyin yê Muradî bi sernameyê "Kêneka Gince" ya ke tehmê hîkaye de yew xatiraya xo qisey keno.

Nadîre Guntaş Aldatmaz nuşteyê xo yê bi sernameyê "Çend Dewanê Mamekîye de Derheqê Domanan de Tayê Adet û Bawerî" de behsê tayê edetanê sosyalî yê şarê mintiqaya Mamekîye kena.

Nînan ra teber gelêk şîîrî û nuşteyê bînî zî na hûmare de ca gênê.

________

YASAL UYARI: www.zazaki.net kaynağında yayınlanmış herhangi bir haber, yazı veya fotoğrafın site editöründen izin alınmadan olduğu gibi kopyalanarak ya da üzerinde çeşitli oynamalar yapılarak herhangi bir yerde yayınlanması; farklı çalışmalarda alıntı olarak kullanmak amacıyla cümle veya paragrafların kopyalanmasında ise standart bir şekilde kaynak belirtilmemesi durumunda hukuki süreç başlatılacaktır!