Hûmara 76. ya Newepelî Vejîya

Hûmara 76. ya rojnameyê Newepelî bi muhtewayêka dewlemende û bi nuşteyanê balkêşan vejîya.

Nuşteyanê na hûmare ra nuşteyêko îlmî "Hekîmîya Dindanan de Tetbîqkerdişê Lazerî" yo. Nuşte de kirdkî bi hawayêko akademîk sey ziwanêkê îlmî ameya şuxulnayîş. Nuşte ra yew paragraf wina yo: "Lazer kilmnuşteyê herfanê verênan yê çekuyanê înglîzkî 'Light Amplification by Stimulated Emission of Radiation'î yo. Roşnê lazerî hetê şeklê virazîyayîşî ra bi tayê xususîyetanê xo roşnanê bînan ra cîya beno. Merdim eşkeno nê xususîyetan wina rêz bikero ke, roşnê lazerî yew reng de yo, tîk şino û fotonê ke roşnê lazerî anê wucûd eynî faz de yê. Xususîyetê ey o bingeyên ke tib de û hekîmîya dindanan de yeno bikarardiş, yew reng de bîyayîşê ey o. Sayeyê nê xususîyetî de, gama ke bi lazer vawiteyî (doku) ser o tesîr yeno kerdiş, eşkeno vawiteyê dorûverî ser o texrîbat sewîyeyê mînîmum de bimano." Bi no qayde şuxulnayîşê ziwanî, keno ke kapasîteya kirdkî hîra bibo û her warê îlmî de qîm bikero.

Nuşteyê edîtorî de behsê hetê xirab yê weçînayîşan beno ke, prosesê kampanyaya weçînayîşî de zaf zêde ra qelebalix beno û qirêjî yena meydan. Edîtor nuşteyê xo de vano: "Ti verê xo danê kamca, rîyê heme dêsan, dîregê elektrîkî, trafoyî, kolonê pirdan, vîyadukî, axir kamca ke esto fotografê namzedan, afîşê partîyan dusnîyaye yê. Qasê vizikêk bîle ca veng nêverdanê. Manzarayêka hende qirêje virazîyena ke zerrîya merdimî ci ra qelibîyena. Nê fotograf û afîşî heme bi şîrêz dusnenê dêsan wa, hetanî yewna weçînayîş wina manenê."

Nuşteyanê na hûmare ra, Abdulhemîd Yusifî bi munasebetê 24. serrîya rehmetkerdişê Mela Ehmedê Paloyî, derheqê Mela Ehmedî de yew nuşte nuşto. Aydin Baturî mîyanê kirdan de sinetê viraştişê qedayîfî ser o nuşto. Seyîdxan Kurijî Çewlîg ra Ap Seyfî dayo şinasnayîş.

Şîîrê na hûmare; cinîyan ra Canê Dilo, Hacer Petekkaya û Kendal Tosune, camêrdan ra zî Dilo Bargiran û Starê Xelan nuştê.

M. Emîn Kaçanî xîtabeto menşûr yê Seîdê Kurdî "Ey Şarê Kurdan" kurmanckî ra tadayo kirdkî ser. Seîdê Kurdî vano "Wendiş, wendiş, wendiş û destê yewbînan tepîştiş, destê yewbînan tepîştiş, destê yewbînan tepîştiş…"

Ebdulqadir Necaranijî yew mesela kitabê Îbnu'l-Esîrî El Kamîl Fî’t Tarîx ra tercume kerda. Wesîla Doguç, Îsmet Bor û Mistefa Gomayijî zî her yewî yew mesela arêdaya. Necîbe Kirmizigul yew werdê ma tarîf kerdo, Ehmedê Dirihî zî sey her hûmare nameyê yew nebate nuşto.

>Newepel biwanîn, bidîn wendiş.

>Wayîr vejiyîn, bibîn abone.

>Newepel vengê kirdan o. Newepel mektebê averşîyayîşê kirdkî yo.