Hûmara 80. ya Newepelî Vejîya

Hûmara 80. ya rojnameyê safî bi kirdkî Newepelî ancî bi muhtewayêka dewlemende vejîya.

Edîtor nuşteyê xwu de behsê têkilîya Hereketê Xurremîyan û tarîxê ma kirdan keno ke badê şikîyayîşê serewedartişê Babekî (795-838) mintiqa de nufûsêko muhîm serûbin bîyo, gelêk grûbanê komelkî sedemanê dînî ra cayê xwu ra koç kerdo. Edîtor kitabanê tarîxî ra nê melumatî zî neql keno: "Xurremî Îsfehan de, Buc de, Kerec de, Ebûdulef de, Zazeyin de, yanî Zazê Muxelî û Zazê Ebûdulefî de, ancî Versencan, Qasem û Guzeşt de ke dewê Saymere ê mintiqaya Mehrcan-Gazege yê, qesabayê Sîrwan û Ayrucanî ke şaristananê mintiqaya Masobzanî ra yê, Hemedan, Mehkûfe, Mah, Besra, Azerbaycan, Qûm, Kaşan, Rey, Xorasan û sewbîna mintiqayanê Îranî de ciwîyayê. (…) Bi îzafeyê 'eyn'î ke seba dilet bîyene şuxulnîyeno Zazeyn, yewe Lalistanê mabeynê Îsfehan û Lûristanî de, a bîne zî mintiqaya Hemedanî de, nameyê di dewan o."

Roportajê na hûmare, Îdrîs Yazarî dengbêjê mintiqaya Qerebegan Wisê Cimî dir kerdo. Wis roportajê xo de vano: "Ziwan yasax bi. Ma zaf nêeşkên xwu eşkera bikirî. Sade ziwan ney kurdbîyayiş zî suc bi. Polîson Edene de cêba mi de yew qaset dî, ez berdo qereqol seba deyîra 'Hawar Delal' ez kuto."

Na hûmare de Aydin Baturî nuşteyê xwu de mintiqaya Tavzî daya şinasnayîş. Murad Canşadî çarçewaya cuya şexsîyetê tarîxî Harpagosî de nakokîyê ke nika fikrê sîyasîyanê kurdan de estê nîşan dayê. Ehmedê Dirihî, Mistefa Karadagli, M. Mamet Qetekonij û Necîbe Kirmizgul bi nuşteyanê xwu rojname de ca girewto. Rukîye Dîcle, Wesîle Doguç, Mistefa Gomayij û Sîyamend Mîrvanî, her yewî yew mesela arêdaya. Mujdat Gîzlîgol û Sevîm Aydin zî deyîrê ma arêdayê û nuştê.

Şîîrê na hûmare yê Îrfan Akdag, Hacer Petekkaya, Muhamed Deza Batur û Şaynebî Laçînî yê.

Sey hûmaranê verênan, na hûmare de zî werdê ma, nameyê nebatan, kitabê neweyî, xaçepers û ferhengekî ca girewto.

Nuştoxê neweyî yê na hûmare Rukîye Dîcle û Îrfan Akdag ê. Bi no qayde Newepel bi her hûmara xwu nuştoxanê kirdkî bineyna zêdneno.