Hûmara 84. ya Newepelî Vejîya

Hûmara 84. ya rojnameyê safî bi kirdkî Newepelî bi gelêk nuşteyanê balkêşan vejîya.

Edîtor nuşteyê xwu de behsê texrîbatê ke par hamnanî ra nat şaristananê bakurê Kurdîstanî de benê keno. Edîtor vano "Dewlete wazena bajaranê ma yê otantîkan birijno û bi no qayde nasnameyê bajaranê ma texrîb bikero, têkilîya hafizaya kurdîtîye û mekanî cêra aqitno. Dewlete netîce de wazena bajaranê ma temamen bigêro binê kontrolê xwu û dereceyê dagîrkerîye hîna xorînêr bikero."

Roportajê na hûmare Yaşar Balukenî nuştox Îsmet Borî dir kerdo. Îsmet Bor roportajê xwu de vano "Ez nêvana, pedagogê pêro dinya vanê, qijo ke ziwanê maya xo museno cuya xo de hîna zaf serfiraz beno. Merdimo ke ziwanê dayika xo museno û qisê keno, ziwananê bînan hîna asan museno."

Murad Canşad nuşteyê xwu de tarîx ra nimûneyan dano û behsê şerwazîya tirkan keno. Huseyîn Karakaş behsê rejîmê Stalînî yê dewrê Sovyetan keno û vano "Ez çi wext derheqê rejîmê Stalînî de çîyê biwanî, mumkin nîyo ke analojîyê ma kurdan hêşê mi de nêbo rêz û resene! Ez nêzana çira?"

Aydin Batur, mintiqaya Çewlîgî ra dewa Metan û Gola Keyneke bi ma dano şinasnayîş. Huseyîn Çakan halê xwu ra û miletê xwu ra dûrkewtişê qismêkê sîyasîyanê ma yê mîlîtanan rexne keno.

Wesîle Doguç û Mistefa Gomayijî sanikî, Îdrîs Yazarî yew deyîre, Hecî Akalinî vateyê verênanê ma, Ebdulqadir Necaranijî zî yew mesela arêdaya û rojname de daya weşanayîş. Hesen Aslanî hûmara 6. ya kovara Hawarî ra yew mesela kurmanckî ra tadaya. Şîîrê na hûmare zî yê Îrfan Akdag, Hesen Rûsipî, Sevîm Aydin, Sîbel Doguç, Haşîm Güreli, M. Mamet Qetekonij û Roşan Lezgînî yê.

Nînan ra teber, Uzlem Doguç tarîfê werdê ma nuştê, Ehmedê Dirihî zî nuştişê nameyê nebatan dewam kerdo. Sewbîna xeberî, xaçepers û ferhengek na hûmare de ca gênê.

Nuştoxanê na hûmare ra Uzlem Doguç, Hesen Rûsipî û Haşîm Güreli reya verên a ke nusenê.