ROJA DAYÎKAN DE...

Maya mi!

Ez ewro û dima çi binivîsî o do kemî bimano, kemasey do nêqedîyo. Nika, na şewa tarî de yew kile kewta ra zerrîda mi. Şewra mi ser o yew siqintî bî la mi nêzanayê çira bi.

Her kes maya xo rê çîyanê weşan nuseno la ez nêeşkena, nêeşkena çîyanê weşan binusî. Çimê mi bîyê pirrê hsiran, zerrîya mi veşena, ganê mi teweno. No adir do çi wext şiro hewn a, ez çi mihal bişî xo ef bikerî. Fotografê to ha mi dest de. Hend wext ravîyard hena? Des û hîrê serrî bê to na cuye senî dewem kerde?

Kes nêzano û kes fahm nêkeno. Adir bikewo kotî uca veşneno. Mi vatê qay ke ez musaya bi mergê to, mi qebul kerdo la nê nê maya mi nê, kes nêeşkeno bimuso bi mergî. Merg hinî yew adir o ke hewn a nêşno. Kesî rê nê ez xo ra zaf qahirîyena. Mi, ma nêzana degerê, qîymetê to. Ti bi kemaseya heskerdena şîya, ti bi hesreta ma ya, maya xo ya, birayanê xo ya şîya û ez weş zana ke ê çimê to akerde mendî.

Ne ma qeçkîna xo zanê ne zî to mayîna xo; ne ma tam dî qeçkîna xo ra ne to tam dî mayîna xora. Kemasî kotî de bî, kamî de bî? Ma çiçî kemî musaybîme, kamcîn hîs ra bêxer bîme?

To dima mi fahm kerd, to dima ez bîya girde. Mi merg nas kerd, bêmayîye nas kerde. Mi bermayîşê xo nêmot kesî, qehrê xo nêmot kesî. Tenîya bermawane, şewan de bermawane, kewta cayan bermawane. Di serrî her şewe ti newe ra bîya gane, newe ra merda hewnanê mi de. Ez tersane, mergî ra zaf tersane û musane pey de mendene, musane. Mi suwend werd ez dayê qeçek nîyarî, kesî xo pey de nêverdî. Zaf qahryane to ra zî ti senî qîymişê ma bîya hena? Rojî, aşmî, serrî çetinî bî hewna zî çetin ê. Çend serrî herge ke yewerî vatê ana! Mi nêşayê xo tepişî, hesirê xo kerdî war, mi kerd bi xo vîr ra vatişê "ana". Na çekuye senî fekê mi ra vejîyayê, senî mi rê hena bîbî ewayine.

Serrê mi bî vîst û heşt la ez gird nêbîya maya mi. To dima ez qet gird nêbîya.

La ti zana nika ez wazena yew keyneka mi bibo û ez emel kena a do bibo. Homa do aye bi mi do. Belkî wexto benane rehete, belkî Pîyaya xo ya pîya hem qeçkina xo, hem mayîne musena, ha maya mi? Belkî o wext xo zî ef kenane. To dima ez zî merdane, Pîya mi do ruh pif bikero, gan bido bi ganê mi.

Hele vaje mi ra.

Qet mi roja mayanê to pîroz nêkerde, lew bi destanê to ya, gumanê to ya nêna hînî nê.

Axxx, no adir senî şiro hewn a?

Maya mi ez zana vengê mi yeno bi to û ti ha mi vînena. Roja to û mayanê bînan hemîne pîroz bo, nêşî lew to destanî zî nana fotografê to ya. Ti zî eşmo bê hewnê mi, lew çareyê mi nane û ef bike na keyneka xo ya werdîleke...