Şewçila weşanê xwu dewam kena

Kovara ŞEWÇILA newe ra dest bi weşanê xwu kena.

Ma edîtor û redaktorê kovara ŞEWÇILA mamosta Roşan Lezgînî rê teklif kerd ke destûr bido, ma çend hevalî weşanayişê kovare dewam bikerê. Mamosta Roşan Lezgînî bi keyfweşîye hem destûr da hem zî do bi her hawayî ma rê destegîr bo. Ma ey rê zaf sipas kenê û înşelah ma şerme de nêmanenê.

Seke yeno zanayiş, kovara ŞEWÇILA wesarê 2011î de dest bi weşanê xwu kerd û hetanî payizê 2018î, 16 hûmarî weşanîya. Eno wext de, hema vajêne ke zafaneyê nuştoxanê ŞEWÇILA reya verîne kovare de dest bi nuştiş kerdo. Yanî, eno îsbatkerde yo ke kovara ŞEWÇILA tarîxê ziwanê ma yê nuştekî de, tarîxê edebiyatê ma de sey yew mektebê nuştoxîye yew rolo zaf muhîm kaykerdo. Ma wazenê kovara ŞEWÇILA enê mîsyonê xwu dewam bikero.

Kovara ŞEWÇILA hetanî nika tenya çarçewaya edebî-hunerî de nuşteyî weşanayne. La ma wazenê eseranê folklorikî, nuşteyê teorîkî-fikrî, nuşteyê derheqê ziwanî de, heta ke, ma wazenê nuşteyanê başan yê kulturî zî biweşanê. Yanî ma wazenê bergeyê nuşteyanê kovara ŞEWÇILA bineyna hîra bo.

Nika ra ma semedê hûmara 17. nuşteyan arêdanê. Çi wext qasê yew hûmare nuşteyî bêrê pêser, ma weşanenê. Coka ma paweyê nuşteyanê nuştoxan ê. Berê ma her kesê ke wazeno xizmetê ziwan, edebîyat, huner û cîhanê fikrî yê Kirdî bikero rê akerde yo.  Kerem bikerê!...

Têkilî: sewcila558@gmail.com

Mehmet Şah Aslan (edîtor)