Wisif Hêlinij

Wisif Hêlinij (Kaymak) 03.12.1954 dewa Pîranî Qelbîn de dadîya xo ra bi. Gedeyîya (domanîya) ey, a dewe de vîyarte. Panc serrî mektebo verên Qelbîn de wend. Dima, seba ke îmkanê keyeyê înan çin bî, o nêşawitbi mekteb. Ey, xo vero da piro şi medreseyanê cîya-cîyayanê Kurdîstanî de wend. Girewtişê îcazeyê (dîplomaya) medrese dima, reyna xo vero şi paytextê Sûrîye, Şam. Uca lîse qedêna. Lîse ra pey şi Misir, Unîversîteya El-Ezherî de, qisimê rojnamegerî (gazetecilik) qedêna. Qahîre ra şi Parîs û tezê xo yew unîversîteya Parîsî de nuşt. Wisifî zaf baş bi erebkî û franskî zanaynî.

Dima mîyanê Grûba Xebate ya Vateyî de ca girewt û beşdarê 11 kombîyayîşan bi. Çend nuşteyê ey zî kovara Vateyî de weşanîyayî. Wisif Hêlinij hema emrê xoyê ciwanî de paytextê Fransa Parîs de roja 16.10.2008 de netîceyê qezayêkê trafîkî de dinyaya xo bedilna. Cinazaya ey roja 23.10.2008 de dewa ey Qelbîn de defn bîye.