Ewnîyayîş - Muhakeme - Qenaet!...

Gama ke ma ewnîyenê meseleyêk, biyayişêk, qewimîyayişêk, karêk yan zî mefhûmêk ra, derheqê ê çiyî de ma benê wayirê fikrêk û enê fikrî gore ma muhakeme kenê, derheqê ê çiyî de yew qenaetê ma virazîyeno. La esas seba ke ma tenya hetêk ra ewnîyenê, beno ke ma eslê çî nêvînenê, coka derheqê ê çiyî de ma benê wayirê fikrêkê kêmî yan zî xeletî û ma bi enê fikrê nîmcetî yan zî xeletî muhakeme kenê. Peynîya enê muhakemeyî de zî qenaetêko xelet ma de virazîyeno.

Ca yan zî heto ke merdim ewnîyeno, zaf muhîm o. Reye esta merdim hetê raştî ra, cayo raşt ra nêewnîyo, merdim raştî nêvîneno. Ez vana qey bi enê hîrê fotografan ez do meramê xwu hîna baş bidî famkerdiş.

Eno fotografo cêrîn fotografê yew çî yo. La hîrê hetanê ciyayan ra ameyo antiş.

Seke aseno gama ke merdim ewnîyeno fotografê yewinî ra, aseyişêko bêmehna keweno verê çimê merdimî. Merdim nêeşkeno yew mehna bido çiyo ke fotograf de aseno.

Fotografo diyin yewna het ra ameyo antiş la ancîna tede çiyêko manîdar çinê yo. Tenya merdim vîneno ke tayê kîsikê boksî bi têl ameyê aleqnayiş.

Eke ma hetê raştî ra biewnîyê... Haaa! Mesela fam bî. Eno eserêko hunerî yo. Muhteşem o.

Pê kîsikanê boksî ke bi têl ameyê aleqnayiş, resmêko hunerî yê boksorê namdarî yê cîhanî Muhammed Alî Clay ameyo viraştiş.

Eno esero muhteşem hetê hunermend Michael Kalishî ra ameyo viraştiş. Michael serra 2008 de şewêk hewnê xwu de vîneno ke kîsikê boksî sey hesirê çiman cor de yenê war û hewa ra vindenê, enê kîsikan ra sûretê boksorê namdarî yê cîhanî Muhammed Alî Clay virazîyeno.

Hunermend Michael Kalish, dima çiyo ke hewnê xwu de dîyo, eynî bi o qeyde enê eserî virazeno. Viraştişê eserî de 2500 heb kîsikê boksî, 10500 metre têlo ke zingar nêgêno û 1100 metre zî luleyê elemînyîmî xerc kerdê.

Çiyo tewr muhîm yê enê eserê muhîmî eno yo ke, tenya hetêk ra, yanî eke merdim cayo raşt ra biewnîyo, eslê eserî vîneno. Sewbîna, ti kam hetî ra biewnîyê, tu mehna tede nêasena.

Xwura heyat de zî zafê çiyan wina nîyê? Seba ke ma hetê raştî ra, cayo raşt ra nêewnîyenê, zafê çiyan ma rê şaş asenê yan zî ma derheqê ê çiyan de benê wayirê qenaetêkê xeletî.

Çiyo muhîm eno yo ke merdim bieşko çend hetan ra biewnîyo. Belkî o wext derheqê çiyan de merdim bibo wayirê yew qenaetê mehqulî.