Li Min Binêre

.

li min binêre

binkirasê ruhê çiriyayî

mîna straneke melûl

xwe li efsûnîya şevê pêçayî bi ruhekî perçe

rûyê hevokan ji agir

ji qirikê berjêr veşartî

li min binêre

bila lêvên gewez rûyê te bialêsin

ji hilma pehîza kezîzer

ji pelên çilmisî

huznê biavêje baskên çivîkên sibatê

dilê xwe bike goristanek bêxwedî

û li min binêre

ji cûreyên kûlîlkên buharê bêpar

xwezî li qirika te zuwa

û bila çûyînek dest pê bike berevajî

pirî caran jî xapînok

mayîndeyek bi tenêtîyê re

tu li min binêre

vexwe jehra evînê ji tasa zêrîn

bêhemdê xwe keştîyên te wêran

li ber pêlekan ketî

dirbên ramûsanên neqişandî

di paxila te de

bila bibin xencerek rûreş

her şaxeke nû biwelidîne ji zayînê

ji birînên bîranînan

li tixûban bimîne asê

û bêdeng bimîne

bêdeng li min binêre!...

Resim: Delawer Omer

Havîn Acar, Li Min Binêre, Weşanxaneya Roşna, Diyarbekir, 2019