Mektûbo Yewin

Cewabo kilmek yê çar persan o

Persa yewine: Hezretî Xizir eleyhîsselam heyat de yo? Eke heyat de yo, çi ra tayê alimê muhîmî heyatê ci qebûl nêkenê?

Elcewab: Heyat de yo. Labelê mertebeyê heyatî panc ê. O, mertebeyo diyin de yo. Eno sebeb ra, tayê aliman heyatê ey de şibhe kerdo.

Tebeqeyê heyatî yo yewin, heyatê ma yo, ke bi zaf bendan beste yo.

Tebeqeyê heyatî yo diyin, heyatê hezretî Xizir û hezretî Îlyas eleyhîsselamî yo, ke yew derece serbest o. Yanî yew wext de eşkenê zaf cayan de bê. Sey ma lazimatîyanê beşerî ra tim beste nîyê. Reye esta, çi wext biwazê, sey ma wenê û şimenê la sey ma mecbûr nîyê. Hezretî Xizirî dir macerayê welîyanê ke ehlê şehîdan û keşfî yê, dereceyo zêde de enê tebeqeyê heyatî roşin û îsbat kenê. Hetta, meqamanê welîtî de yew meqam esto ke sey meqamê Xizirî tehbîr beno. Yew welîyo ke bêro ê meqamî, Xizirî ra derse gêno û Xizirî dir qisey keno. Labelê reye esta wayirê ê meqamî bi xeletî sey çimeyê Xizirî yeno qebûlkerdiş.

Tebeqeyê heyatî yo hîrêyin, tebeqeyê heyatî yê hezretî Îdrîs û hezretî Îsa eleyhîsselamî yo, ke bi lazimatîyanê beşerî ra teberbiyayiş û dekewtişê yew heyatê sey heyatê melekan, yew letafeto nûranî kesb kenê. Bi cismê xwu yo nûranî ke hema vajê dirûvê bedenê letîfî de û şeklê astereyanê roşnan de yo, semayan de manenê.

Sirrê hedîsa ke mealê “Axirê zemanî de hezretî Îsa eleyhîsselam do bêro û bi şerîetê Mihemed sellelahû eleyî wes-selemî emel bikero” de ya, eno yo:

Axirê zemanî de, vera cereyanê kufrî û înkarê îlahîyetî ke felsefeyê tebiî dano, yew demo ke dînê Îsewîtî sefêyeno û xurafetî ra vejîyeno û tadiyeno Îslamîyetî ser de, senî ke şexsîyetê mehnewî yê Îsewîtî bi şimşêrê wehîya semawî şexsîyetê mehnewî yê a bêdînîya şedîde kişte, bi eynî şekil, hezretî Îsa eleyhîsselam zî bi temsîlkerdişê şexsîyetê mehnewî yê Îsewîtî, Tecalo ke şexsîyetê mehnewî yê bêdînîtî temsîl keno, kişeno. Yanî do fikrê înkarê îlahîyetî bikişo.

Tebeqeyê heyatî yo çarin, heyatê şehîdan o. Hukmê Quranî gore, ehlê qebran ra serêr yew tebeqeyê heyatî yê şehîdan esto. Belê, seba ke şehîdan heyatê xwu yê dinya rayirê heqî de feda kerdo, cenabê Heq zî kemalê keremê xwu ra alemê Berzexî de yew heyato bêkeder û bêzehmet ke maneno heyatê dinya înan rê îhsan keno. Ê xwu merde zanê. Labelê ê zanê ke şiyê yew heyato baştir. Bi yew seadeto kamil lezetdar benê. Dejê cêrabiyayişî yê mergî hîs nêkenê.[2] Ehlê qebran ra ruhê gelekan baqî yo; la ê xwu merde zanê. Lezet û seadeto ke Berzex de gênê nêreseno lezetê şehîdan.

Ma vajê ke di merdimî yew hewn de dekewtê yew saraya sey cenetî. Nînan ra yew vano qey hewn de yo; keyf û lezeto ke gêno gelek nuqsan o. Xwu rê fikirîyeno vano “Eke ez aya bî, eno lezet do nêmano.” Oyo bîn, nêzano ke hewn de yo; bi lezetê heqîqî beno mezherê seadetê heqîqî. Bi eno qeyde, merdeyî û şehîdê ke alemê Berzexî de yê, heyatê Berzexî ra îstîfadekerdişê înan de wina ferq esto. Mezherê eno hawa heyatî biyayişê şehîdan û xwu gane zanayişê înan bi gelek biyayişan û rîwayetan sabît û qethî yo. Hetta, hezretî Hemze ke serekê şehîdan o, bi gelek biyayişanê ke tekrar biyê, merdimanê ke xwu eşto bextê ci û ey ê muhafeze kerdê, karê înan ê dinya hel kerdê û dayê helkerdiş, eno tebeqeyê heyatî bi gelek biyayişan ameyo roşinkerdiş û îsbatkerdiş. Hetta, ez bi xwu zî, bi nameyê Ubeydî yew birarza û telebeyê mi estbi; badê ke mi het de û mi vera şehîd bi, wexto ke ez yew mesafeyê hîrê aşman de esaret de biya, herçiqas mi cayo ke o tede amebi definkerdiş nêzanayne zî, mi gore yew hewno sadiqane de, ez dekewta qebrê ci yo şeklê yew odaya binê erdî de. Mi o heyatê ci yê tebeqeyê şehîdan de dî. Ey vato qey ez merda; va ez semedê to zaf bermaya. Ey xwu heyat de zanayne. La seba ke îstîlaya orisan ra endîşe keno, xwu rê binê erdî de yew odaya weşike viraşta. A enê qismê hewnî, bi tayê şertan û emareyan, heqîqeto ke vîyart, dereceyê şehîdan de yew qenaet dayo mi.

Tebeqeyê heyatî yo pancin, heyatê rûhanî yê ehlê qebran o. Belê, merg bedelîyayişê mekanî yo, rehakerdişê ruhî û wezîfe ra terxîs o; aleqnayiş û çinêbiyayiş û qediyayiş nîyo. Bi gelek biyayişan, temasul û aseyişê ehlê keşfî yê ruhê welîyan û sewbîna ehlê qebran ma dir ruhen û hewn de minasebetê înan û biyayişî gore xeberê ke danê ma enê tebeqeyê heyatî bi gelek delîlan roşin û îsbat kenê. Xwura Vateyê Vîst û Newine ke derheqê cûyayişê ruhî de yo, bi delîlanê qethîyan eno tebeqeyê heyatî îsbat kerdo.

_______________________

Tirkî ra tercume: Roşan Lezgîn