Di kitabê ma şî metbea

Sey destpêkê emserrî ewro di kitabê ma şî metbea. Bi eno qeyde heta nika 58 bi kirdkî, 5 bi kurmancî û 2 zî tirkî pêropîya benê 65 kitabê 42 nuştoxan Weşanxaneyê Roşna ra weşanîyenê. Zafê nuştoxan zî reya verîne rojnameyê Newepelî, kovara Şewçila yan zî keyepelê Zazakî.Net de dest bi nuştiş kerdbi.

Kitabo verîn, dosyaya şiîran ya Wusênê Gestemerdeyî ya. Dosya de 63 şiîrî estê. Wusênî 45 rojî verê cû dosyaya xwu ma rê şirawite. Ma dosya kontrol kerde û seba weşanayişî erê kerde. Dima ma qasê aşmêk ser o bi detay xebitîyayî; ma heme şiîrî redakte kerdî, sey xebata edîtoryale nameyê zafê şiîran û nameyê kitabî zî tede newe ra tenzîm kerdî û rêz kerdî. Dosya weşanî rê amade kerde û ewro şirawite metbea. Dosyaya Wusênî ra parçeyê yew şiîre wina yo:

ax domanê welatê mi

domanê kirmancîya beleke

domanê kurdistanê rengînî

ez nika şima se biyarî ra ziwan, se

ez nika gerreyê şima kamî de bikerî

kam ma rê berbeno, kam ma rê zîbeno

pepûg halê ma rê biwano dayê

pepûg halê ma rê biwano

Kitabo diyin, dosyaya hîkayeyan yê Roşan Lezgînî ya. Kitab de 13 hîkayeyî estê û reya verîne serra 2006 de bi nameyê Halîn Îstanbul de Weşanxaneyê Komalî ra weşanîyabi, dima bi eynî name sey çapê diyin 2015 de Diyarbekir de Weşanxaneyê Roşna ra weşanîya. Zafê hîkayeyê ke eno kitab de ca gênê peynîya serranê 1990an de nusîyayê. Nika nuştoxî eno kitab tadayo kurdîya kurmancî ser û bi nameyê Serketina Kewan weşanîyeno. Bi eno qeyde beno kitabê diyin yê hîkayeyan yê Roşan Lezgînî ke bi kurmancî weşanîyenê. Verê cû, kitabê hîkayeyan Binê Dara Valêre de (2001) bi nameyê Li Bin Dara Bîyê 2003 de Îstanbul de Weşanxaneyê Elma ra weşanîyabi. Hîkayeya Serketina Kewan ra yew paragraf wina yo:

Ez ji kewan pir hez dikim. Kewên gozel, ên sûsik, ên çîrr. Kewnêrên rubat, ên celab, ên serdar. Û marîyên narîn û delal. Çi teyrên xweşik in. Nikula wan sor e, mîna ku hine kiribin. Çavên wan gilover. Wisa masum û delal in ku ez bi saetan li nava çavên wan binihêrim jî cardin ez têr nabim. Serê wan mîna qijak û kund û qertalan bêbîçim nîne. Serîyekî wisa xweşik ku di nav pûrtê nerm de hatiye pêçan û bi gewdeyê wan re lihevhatî. Serîyekî maqul; ne qure ne ehmeq û ne jî bêtore ye. Lê ewçend jî biesalet.

Wusênê Gestemerde, Xezala Koyê Bîngolî, Weşanxaneyê Roşna, Diyarbekir, 2020, 104 rîpelî
ISBN: 978-605-69193-8-1

Roşan Lezgîn, Serketina Kewan, Weşanxaneya Roşna, Diyarbekir, 2020, 96 rûpel
ISBN: 978-605-69193-9-8