Edebîyatê Ma de Yewna Roman

Bi nameyê Heyf edebîyatê ma de yewna roman vejîya. Romanê Serwet Akkaşî Heyf Diyarbekir de Weşanxaneyê Roşna ra weşanîya û 286 rîpelî yo.

Serwet Akkaş romanê xwu Heyf de bi ziwanêko dewlemend, fesîh û hende zî sakîn seraser cuya koyan ra behs keno. Cuya koyan ra, cuya zehmete ya gelî û hîşaranê Zagrosan ra, zinar û neqebanê koran yê Çarçela ra menzerayê şerî; şero bêmuwazene ke girewtişê "heyf"î ser o dewam keno. Esas hîna zaf mucadeleyê ciwîyayiş o. Hem heyf hem heyf!...

Serwet Akkaş dewa Mêrdinîkî (Göle-Erdexan) Gundik ra yo. Reya verên a ke mintiqaya Erdexanî ra yew eserê ma yo nuştekî vejîyeno meydan.

Roman ra yew paragraf winî yo:

"Zeraqê rojî giran-giran dayêne serê koyan ro û bereqnayêne. Dûrî ra werfa serê Cîloyî sey xêlîya serê sereyê veyveke bereqîyêne. Werfe sey veyvekênî xo verdayêne ra cêr. Tikê cayî rind ameybî cêr, tayê cayî cor ra mendêne. Mîyanê werfa çend serran de hîşarî bîyêne berz. Tîjîya rojî ya virnêne dayêne nê cayanê Cîloyî ro. Cîloyî heybet, esalet, rindekîye xo de ardbî pêser. Ti vana qey dîrega Kurdistanî bî. Dûrî ra ke ameyêne temaşe kerdene, ti vana qey asmên pêgirewtêne."

Serwet Akkaş, Heyf (roman), Weşanxaneyê Roşna, Diyarbekir, 2017, 286 rîpelî