Weşanxaneyê Roşna ra Çar Kitabî

Weşanxaneyê Roşna ra çar kitabê bînî yê kirdkî weşanîyayî. Mîyanê di serran de bîyî 23 kitabî ke Weşanxaneyê Roşna ra weşanîyenê.

Kitabê yewin yê Nadîre Guntaş Aldatmaz “Folklorê Kirmancan Ser o” yo. Babeta nê kitabî tezê lîsansê berzî yo ke sey tezê tewr verên yê kurdkî Tirkîya de qebul bibi. Kitab hewt beşan ra yeno pê. Nadîre Guntaş Aldatmaz cigêrayîşê xo bi granîye folklorê mintiqaya Mamekîye, Licê û Sêwregi ser o kerdo. Beşê diyin yê kitabî de derheqê îlm û xebata folklorî yê cîhanî ser o melumatanê muhîman dana. Peynîya kitabî de zî fotografê kesanê ke fekê înan ra eserê folklorîkî arêdîyayê, çî û cayanê folklorîkan estê. Nadîre Guntaş Mamekîye-Dêrsim ra ya.

Kitabê diyin yê Îlhamî Sertkayayî “Tayê Bihuyîme” yo. Nê kitabê mîzahî de 500 tene fiqrayî estê. Qismêko muhîm yê nê fiqrayan folklorê kirmancan ra yê la qismêk zî cayanê cîya-cîya yê cîhanî ra yê. Heme fiqrayî bi ziwanêko sade qisey benê. Îlhamî Sertkaya Karêr-Çewlîg ra yo.

Kitabê hîrêyin zî ancî warê mîzahî ra yo. Kitabê bi nameyê “Huyayîş Karode Şorişgêrane yo” Daîmî Doganî amade kerdo. Na xebata verêne ya nuştoxî ya. Kitab de zafane fiqrayê ke hetê Dêrsim û Erzinganî ra arêdîyayê estê la cayanê bînan ra zî estê. Çîyo muhîm heme fiqrayî cuya kurdan ra yê. Daîmî Dogan Pulemurîye-Dêrsim ra yo.

Kitabê çarin yê Huseyîn Karakaşî yo. Kitabê bi nameyê “Zere ra” kitabê hîkayeyan yê diyin yê nuştoxî o. Seke yeno zanayîş, Huseyîn Karakaş mucadeleyê sîyasî ra cezaya muebedî werda û “zere ra” nuseno. Kitab de yewendes hîkayeyî estê ke qismêk cuya teberî ra behs kenê la zafê înan hîkayeyê “zereyî” yê. Huseyîn Karakaş Kangal-Sêwas ra yo.

Kunyeya kitaban:

Nadîre Guntaş Aldatmaz, Folklorê Kirmancan Ser o, Weşanxaneyê Roşna, Dîyarbekir 2014, 248 rîpelî

Îlhamî Sertkaya, Tayê Bihuyîme,  Weşanxaneyê Roşna, Dîyarbekir 2014, 148 rîpelî

Daîmî Dogan, Huyayîş Karode Şorişgêrane yo, Weşanxaneyê Roşna, Dîyarbekir 2014, 64 rîpelî

Huseyîn Karakaş, Zere ra,  Weşanxaneyê Roşna, Dîyarbekir 2014, 102 rîpelî