Weşanxaneyê Roşna ra Diyna Kitabî Weşanîyayî

Weşanxaneyê Roşna ra yew Kirdî yew Kurmancî diyna kitabî weşanîyayî. Emser benê 5 kitabî, pêro piya zî benê 70 kitabî ke Weşanxaneyê Roşna ra weşanîyayê. En 70 kitaban ra, 2 Tirkî, 6 Kurmancî 62 Kirdî yê.

Semedê siparişî: https://www.pirtukakurdi.com/rosna-yayinlari-tr

Kitabo verîn, ebadê 13.5 x 21 de û 248 rîpelî bi nameyê Xezeb kitabê Roşan Lezgînî yo, 51 nuşteyê muxtelîfî ke serra 2010 ra hetanî 2021, yanî nuşteyê ke zerfê dades serran de nusîyayê, tede ca gênê. Nuştox nuşteyê teqdîmî de wina vano: “… nuştiş çiyan tarîx de qeyd keno û bi hawayêko orîjînal neqil keno. Coka ez zî hes kena hîsîyatê xwu, dîyayiş û fikrê xwu bi hawayê nuştekî îfade bikerî, biresnî însananê ewroyî û êyê ke hema do ma ra dima bêrê. Raşta ci, vatişê çiyêk ra wetêr esas nuştiş mi rê amanco sereke yo. Çimkî ziwan bi nuştiş qeyd beno; bi nuştiş ziwan xericîyeno û edilîyeno, hemil û kapasîteyê xwu yê îfadekerdişî hîra keno...”

Roşan Lezgîn, Xezeb, Weşanxaneyê Roşna, Diyarbekir, 2021, 248 rîpelî

 * * *

Kitabo diyin yew romano bi nameyê Yar û Mirad – I ke hetê Welî Sebrî ra bi Kurmancî nusîyayo, ebadê 13.5 x 19.5 de û 240 rîpelî yo. Roman, esas sey rêzila kitaban dewam keno, coka eno cildo yewin o. Enê beşî de biyenê ke badê serra 1915î yê, wexto ke rêbertîya mîlîsanê arminîyan de artêşa Rûsan yena hetê Serhedî de Kurdistanê bakurî dagîr kena qisey benê, hîna zaf behsê Keremê Qolaxasî beno. Roman ra beşêko kilmek wina yo: “Demsal payîz e û em jî li vî çiyayî û li çolê ne. Pirs ne sar û serma ye, lê rê! Di vê tarîyê da, di tarîya şevê da rê li ber me wenda û çûyîn jî bi zehmetî ye. Dema ku çav pêşîya xwe nebînin lome ji lingan nayê kirin ku meriv bike. Dil dilan nas bike çav jî çavan, lê ka... Li vî çiyayî, çiyayê qedirzan çav ji çavan ra xerîb ketiye. Heke tu ji min bipirsî, ez dibêjim mayîna me ya vir ji çûyînê çêtir e. Hela hela, qey tu dibêjî ez nezan im. Ez jî dizanim ku dema meriv bide rê û here, rê li ber merîyan dihele; dixwaze bila berf û baran û dixwaze bila ba û bahoz be. Na! Ne hindik, lê em gelek û gelekî rê hatine. Ê yanî! Şûşar, Tekman û Xinûs li kû û Gimgima xopan li kû? Ezîzê min, ê de rêwîtî ye û rêwîtî jî nîne merîyan newestîne. Ji rîya vî çiyayî ra jî meriv nikare bibêje rê ye. Asê ye û merîyan ditevizîne...” 

Welî Sebrî, Yar û Mirad – I, Weşanxaneya Roşna, Diyarbekir, 2021, 240 rûpel