WEŞANXANEYÊ ROŞNA RA HÎRÊNA KITABÎ

Weşanxaneyê Roşna edebîyatê kirdkî ra hîrêna kitabî weşanayî; kitabê hîkayeyan "Waştî" yê Murad Canşadî û di kitabê hîkayeyan yê Roşan Lezgînî "Tarîyîya Adirî de" û "Halîn". Kitabê Murad Canşadî reya verên a ke weşanîyeno. La her di kitabê hîkayeyan yê Roşan Lezgînî sey çapa diyine weşanîyenê.

"Waştî" kitabê hîrêyin yê Murad Canşadî yê hîkayeyan yo. Kitabê ey o verên "Xafilbela" 2008 de Îstanbul de Weşanxaneyê Vateyî ra weşanîyabi. Dima kitabê ey o diyin "Hesê Mişî" zî 2013 de, Dîyarbekir de, Weşanxaneyê Roşna ra weşanîya.

Kitabê Murad Canşadî Waştî 80 rîpelî yo û bi nameyanê 'Weşîya Şewe', 'Sanika Biza Sîse', 'Hesabpersayîş', 'Ap', 'Kêneka Gince', 'Îtîraz', 'Alo Çar', 'Derdê Ziqimê Sîyayî', 'Waştî', 'Teneke', '"Ben Bu Gece Bir..."', 'Pers û 'Gulnaz, Gulnaza Mi' hîrês hîkayeyî tede estê. Murad, sey kitabanê xwu yê verênan nê kitabî de zî ziwanêko zaf fesîh û zelal şuxulneno: "Çi wext vewre lepalep bivarayêne, mi sere peyser dayêne, rîyê xo çarnayêne bi asmên, çimî piro tîk kerdêne. Rîyê asmênî ra tena purilîyê vewre asayêne. Ne hewrî ne roj ne tîje… Purilîyî lepalep varayêne bi sere û çimanê mi ser. Fekê min ê akerdeyî ro kewtêne zere. Mi winî zanayêne ke ê cor ra nîyenê war, ez cêr ro ver bi înan bena berz. Ez sey tîra kemanî purilîyan ro tîkatîk bîyêne berz! Mi vatêne ez nika resena asmênê hewtine! Vileyê mi dejayêne, mi sere dayêne xo ver, seyr kerdêne ke ez nêşîya cayêk, ha cuwenê ma de. Heto yew de banê ma; çirtika hênîyê kîşta banê ma ra şirr-şirra awk a. Banê cîranan, dere-derxuleyê dormeyî… Seke ez hewn ra biba aya."

Kitabê hîkayeyan yê Roşan Lezgînî "Halîn", sey çapa yewine 2006 de Îstanbul de hetê Weşanxaneyê Komalî ra weşanîyabi. Kitab 96 rîpelî yo û tede bi nameyanê 'Wayîrê Zimbêlan', 'Hêrsê Estûna Mermere', 'Tena Estareyî Şahidb bî', 'Kema Hewirsî', 'Mergê Yew Kutikê Esîlî', 'Elametê Qîyametî', 'Birîna ke Çareyê Mi de ya', 'Pêrodayîşê Kutikan', 'Perşe', 'Xayîn', 'Serkewtena Zerencan', 'Ziwano Mehellî' û 'Halîn' hîrês hîkayeyî tede estê.

Kitabê hîkayeyan "Tarîyîya Adirî de" zî, reya verêne 2012 de, ancî hetê Weşanxaneyê Roşna ra Dîyarbekir de weşanîyabi. Seba ke çapa verêne nêmendbî, coka newe ra weşanîyayo. Kitab 80 rîpelî yo û tede di grûbê hîkayeyan estê; grûba verêne de bi nameyanê 'Tarîyîya Adirî de', 'Buhran', 'Sifre', 'Reqemî', 'Kek Dewrim' û 'Şala Sîya' şeş hîkayeyî, grûba diyine bi sernameyê 'Defterê Nêweşîyan' û bi nameyanê 'Nêweşîya Dîyarbekirî', 'Nêweşîya Maseyan', 'Nêweşîya Nêweşan', 'Nêweşîya Leblebîyan', 'Nêweşîya Sîyataleyî' û 'Nêweşîya Gijikinî' şeşna hîkayeyî, pêropîya duwês hîkayeyî kitab de estê.

Qapaxê her hîrê kitaban zî hunermendê kurdî Seywan Seîdîyanî viraştê, Seywan bi eslê xwu Mahabad ra yo la nika Diyarbekir de ciwîyeno. 

Murad Canşad, Waştî, Weşanxaneyê Roşna, Diyarbekir 2015, 80 rîpelî

Roşan Lezgîn, Halîn, Çapa Diyine, Weşanxaneyê Roşna, Diyarbekir 2015, 96 rîpelî 

Roşan Lezgîn, Tarîyîya Adirî de, Çapa Diyine, Weşanxaneyê Roşna, Diyarbekir 2015, 80 rîpelî