Yarîya xwu pê kerdiş

Bi çiyêk yan bi kesêk yarîya xwu kerdiş, temamê dînan de, pêro medenîyetan û sîstemanê sosyalî de sey yew reftarîya teberê exlaqî de, sey yew xûyo xirab ameyo dîyayiş. La miyanê kirdanê ma de bi însanan, bi çiyan yarîya xwu kerdiş zaf esto. Bi her çî yarî kenê, her çî rê yew qisûr peyda kenê. Eno xûy neke tenya dewijan û cahilan de esto, çiyo ke mi dîyo, zafê wendeyan de zî eynen dewam keno.

Kesê ke eno xûy înan de esto, yanî kesê ke bi sewbîna kesan, bi çiyan yarîya xwu kenê, herçiqas enê xûyî sey mîzah bivînê û xwu rê pê keyf bikerê zî, esas, wazenê perde biancê kêmanî û qisûranê xwu ser; wazenê sewbîna kesan nizim bifînê ke ê berz biasê!

Mi bi xwu Tonst nêdîyo la vanê miyanê kirdanê ma de zî tewr zaf Tonstijî yarîya xwu bi însanan kenê. Mi zî fekan ra şinawito, vanê, ê dewanê dorê Tonstî ra yew xorto rindek, rojêk wazeno şêro Tonst. Vano hela ez şêrî, dê hela mi de zî yew qisûr vînenê yan nê.

Lajek xwu rindek pêşeno, xwu tîtikneno û şino Tonst. Gama ke reseno binê dewe, tayê cînî serê hênî de kincan şuwenê. Cînî ewnîyenê ke yew xorto dergo rindek ho cêr ro yeno. Lajek hende rindek o, merdim nêeşkeno biewnîyo ci ra. Xort tam verê hênî ra vîyareno, yew cînî veng dana ci, vana:

- Hêêê! Ti ser a şinê? Camêrdî dewe de çinê yê.

Xort vano:

- Wayê, camêrdê şima şiyê ça?

Cîneke vana:

- Şiyê fekê çemî ra rewtan (bi tirkî: sırık) anê. Ma go bidê beşna to ver, wa çewt nêbo! (Cîneke qama derge ya xortî ci rê kena qisûr.)

Lajek ewnêno ke ey rê zî yew qisûr peyda kerd, hema uca ra apey ageyreno.

Seke mi va, çiyo ke mi dîyo, eno xûy neke tenya aîdê Tonstî yo, hema vajê ke pêro kirdanê ma de esto. Dinya de to rindekêr, to maqulêr, to zanayêr kes çinê bo, ancî to rê yew qisûr peyda kenê!

_________

Tonst: Mintîqeyê Govdereyî de, sînorê Çewlîgî û Pali de yew dewa Çewlîgî ya. Tirkan nameyê ci kerdo "İkizgöl".