Çiğdem Ülkü: "Cinî gereke cesur bê."

Ma bi xeyr dî.

Xêr mîyan de be.

Ti eşkena bi kilmîye xo bidê naskerdene?

Ez Gimgim de, dewa Gulike de ama dinya. Ma di way û jû bira yîme. Ez hêna doman bîya, hîrê-çarserre bîya, çê ma bar kerdo amê Îstanbul, Umranîye. Xora Umranîye de şarê ma zaf o. Ez îta, Îstanbul de bîya pîle. Welat jî, ge-ge ez şîyêne û ameyêne…

Ti çi waxt ra nat muzîk de eleqedar bena?

Domantîya xo ra nat ez muzîkî de eleqedar bena. Yanî zereyê mi de tim muzîk estîbî. Kalikê mi dengbêjan ra zaf hes kerdêne, tim goş nêne dengbêjan ser. Mesela, Şakiro, Dewrêş Baba… Yanî  tesîrê kalikê min û înan zî mi ser o zaf o. Kalikê mi kilamî nêvatêne. Hama ge-ge bi mi kilamî dêne vatene. Dima mi Wan de malimtîna muzîkî wende. Nika jî muzîkî de eleqedar beno.

Waxto ke to kilamî vatêne çê şima û hevalanê to to ra nêvatêne çi?

Waxto ke mi kilamî vatêne înan zî vatêne ti rind vana. Vatêne “Ti Îstanbul de bîya pîle, ama reyna jî ti zonê ma de kilama weş vana.” Yanî mi reaksîyonê rindî guretî. Coka ez kî dahîna zêde nê karî ra bîya dardî.

Ti kamcîn estrumantanê muzîkî cinena?

Ez gîtar, pîyano û yan flute cinena.

Tarzê muzîkê to çik o?

Yanî şîkînîme vajîme etnîk muzîk.

Nê karê muzîkî de kamcîn hunermnend û şaîran to ser o zaf tesîr kerd?

Ez hunermendanê ma kulîna ra zaf hes kena. Mesela, Xidirê Başî ozanê ma wo. Ez kilamanê ey ra zaf hes kena. Çunke zaf zerrî ra vano. Reyna Rêncber Ezîz û Dewrêş Babayî ra jî hes kena. Reyna gencê ma estê... Ahmet Aslan jî rind o, ama dahîna zêde ez Mîkaîl Aslanî ra hes kena.

Teyna besteyanê hunermendan wanena yan ê to zî estê?

Bestê mi jî estê, ama ez zafêrî besteyanê hunermendanê ma û ê bînan wanena. Yanî kurmancî, zazakî, tirkî… Kilamê ke şonê weşa mi ez înan wanena.

Goreyê to muzîkê ma yê ewroyî rind o yan ê vizêrî? Orte de zaf ferqade girse esta?

Ê înan, yanî verêna rind bî tabî. Îna dîyo, onto, coka înan zaf weş viraşto. Ma nika zafêrî îna teqlîd kenîme. Zaf çîyê orîjînalî nêvejînê. Estê, estê ama zaf şenik ê.

Muzîkê kirmanckî de ti cayê cinîyan senî vînena?

Eslê xo de cinî estê, vanê, ama zê camêrdo vernî de nîyê. No problem teyna problemê ma nîyo, problemê her kesî yo. Yanî toplum nîyanên o. Ama gere nîya meşoro. Cinî gereke cesur bê. Ê ke kilama vanê, ê ke nivisnenê, ê ke derdê dîna (înan) esto gereke metersê. Çiqa dest ra ame averde şorê.

Facebook û Youtube de xeylê vîdeoyê to yê muzîkî estê û nê vîdeoyî eleqeyêde zaf rind jî vînenê. Ti na babete de wazena çîyê vajê?

Heya, şarê ma pê qayîl beno. Ci ra hes kenê. No jî zaf şono weşê mi. Heral ez hem gîtar cinena hem zî kilananê yerelî (heremkî) vana coka. No şono weşê înan.

Muzîkî ra teber çi kar kena?

Muzîk ra teber ez jû lîse de malimtîna muzîkî kena.

Naye ra tepîya ti wazena hetê muzîkî ra çi kar bikerî? Yanî na babete de çi projeyê to estê?

Xeylê waxt o ma jû albumî ser o xebetîyenê. Ma qedîna. Nê rojanê vernîya ma de Kalan Muzikî ra vejîno. Album de ma ca da kilamanê zazakî, kurmancî û tirkî. Naye ra dima, ez wazena ke zonê ma ser o tayê bixebîtî û zonê ma rind bimusî. Dima ez wazena sade zonê ma de, yanî zazakî jû albumo bîn virazî.

Êyê ke zazakî û muzîkê zazakî de eleqedar benê înan rê jû mesajê to esto?

Verên de gere ma zonê xo rind bimusîme, dima kulturê xo rind bimusîme. Reyna mordemê ke zonê ma ser o xebetînê înan ra wayîr bivejîyê, emegê înan rê wayîr bivejîyê. Çîyê ke zonê ma de vejîyê, kitabî, dergî înan bicêrê biwanê û xo aver berê.

Seba suhbetî ez zaf teşekur kena û to rê sefîrazî wazena.

Ez kî zaf teşekkur kena.

_______________________________________

*No roportaj “Newepel, Rojnameyê kulturî, Hûmare 89, Dîyarbekir, Temmuze 2016, r. 4” de weşanîyayo.

YASAL UYARI: www.zazaki.net kaynağında yayınlanmış herhangi bir haber, yazı veya fotoğrafın site editöründen izin alınmadan olduğu gibi kopyalanarak ya da üzerinde çeşitli oynamalar yapılarak herhangi bir yerde yayınlanması; farklı çalışmalarda alıntı olarak kullanmak amacıyla cümle veya paragrafların kopyalanmasında ise standart bir şekilde kaynak belirtilmemesi durumunda hukuki süreç başlatılacaktır!