Îhtîmal

Ganî ez zaf dîqet bikerî!
Îş û karê enê kutikan belî nêbeno! Beno ke verê kêberî de, deqaya ke ez vecîyî teber, yew hetê pey ra bêro, fekê tabanceyê xwu bido mi ser...

- Teeeqqq!

Dima do biremo şêro! Kam do xwu bierzo qatilêk ver ke ey bitepişo?! Hem zî seba merdimo ke gunîya xwu miyan de can dano! Qey looserek?! Eke bitepişo do se bibo? Heh! Cînayetanê winî de kes ceza nêgêno! Hem badê ke ez merda, ceza bigêro, se beno!

Wexto ez kewta, do sloganan zî bierzo? Beno zî beno... Wayiranê ci pê dawo ezberkerdiş: "Meterse, mereme zî! Ti seba welatê xwu, seba şarê xwu kişenê! Sereyê ci ser de vindere, bi destêk tabanceyê xwu berz bike û bi desto bîn zî îşaretê ma bike. Bi vengêko bêters vace ‘Bicûyo şarê mi! Bicûyo welatê mi!' Wa dişmenanê welatî û miletî re bibo yew sehneyo ke nêşino vîrî ra! Xwura eno milet zî, eno welat zî qehremananê xwu nêkeno xwu vîr ra..."

Hmmmm... Îhtîmal esto ke seba qetilkerdişê mi domanêk bierşawê... Kutik nîyo kirte yo... Homa belayê hemîne bido! Wa bêrê! Gama ke ez apartman ra vecîyaya... Nê nê, verê vecîyayişî, ez do kontrol bikerî hela kes paweno. Ez do weş biewnî dormareyê xwu ra. "Qaytê xwu be haaa!" Temam, ez do bibî. Keye de qelema kontrolî esta, wa destê mi de bo. Gama ke ez arqilyaya ke qatil yeno, ez do çimê ci de kerî! Heheee! Mission Impossible!

Yaw fîlman de şar senî tabanceyan gangêran dest ra gêno hewwû?! Gereka ez zî zey înan bikerî! "Qatilê xwu tepişt, di sîleyî dayî piro û vat 'Ti şo, wa wayirê to bêro tabanceyê to mi ra bigêro!' Eheeyy!" Weş o, la beno ke vecîyayiş de nê, ageyrayiş de gunîwerêk bêro mi bikişo!

- Teeeqqq!

Ez kewena, qatilê mi remeno, xaloyêko bitecrube yeno sereyê mi ser, heme kes şok de yê, la xalo şok ra rew xelisîyayo. Ê tabî, tecrubeyê ci esto, hende serrî yê ke meqtulan virar keno... Ez bi nefesê xwu yê peyînî, bi zehmetî vana...

Yaw merdim cîfo peyîn de se vaco baş o? "Wa miletê mi heyfê mi bigêro?" Bi heyfgirotişî mesele nêqediyeno, derg beno... Ka humanîzmê mi! "Şarê mi rê vace... Ohho ohhoooo! Wa... Ohohoo... Bi ziwanê ma qisey bikerê..." Winî zî nêbeno... Belkî wextê gandayişî ez nêeşkena rehet qisey bikerî. Himmm... Ez mektûbêko peyîn binusnî, wa cêba mi de bo... Beno ke o xalo xwu vîr ra bikero, wa vatişê mi vinî nêbê...