Kitabe

(Badê Mîladî, serra 2021 de, nuştox Cemîlê Zola bi hetkarîya dewijanê xwu kemerêk eşt romorkê traktorî, ard baxçeyê xwu yê bajarî de rona.)

Ez do virazî!

Kalikanê min ê ke ewnîyayîşê keyfê xwu ra teber çiyêk nêkerd rê ez vacî se! Nêkerd nêkerd, ma se bikerê! Ganî ma zey înan nêkerê, ma bi xwu xîret bikerê! Ahaaa... Ino zinar temam o. Hemeyê mesela çakûçêk û mîxek o, heh! Ihm! Ez senî dest pê bikerî? Ieeyy... "Ino kemer..." Teq teq teq! Çirîng çirîng çirîng! Iiiiiinoooo keeee... Teq teq teq! Çirîng çirîng çirîng! Keeemm, eee... Teq teq teq! Çirîng çirîng çirîng!

Aha! Hmmm, weş aseno. Mevindere! Çirang çirîng, çirang çirîng! Verînanê ma xwu ra nêdî ke, teq teq teq, çirîng çirîng çirîng, bêre kemerek ser o çend çekuyan binusa, teq teq teq, çirîng çirîng çirîng, ewro ma zî zey miletanê bînan, çirang çirîng çirang çirîng, şarî miyan de pesnê xwu bidê, teq teq teq, çirîng çirîng çirîng, vacê "Tarîxê ma hende serrîn o!" Teq teq teq! Çirîng çirîng çirîng! Mi koyan de sî, tat û zinarî nêverdayî, teq teq teq, çirîng çirîng çirîng, ewnîya hemeyan la, teq teq teq, çirîng çirîng çirîng, kesî herfêk zî nênuşta! Teq teq teq! Çirîng çirîng çirîng! Eke nêameyo vîrê înan, ame vîrê mi! Teq teq teq! Çirîng çirang çirîng çirang çirîng çirang! Ez do dest pê bikerî, dîng çîng dîng çîng, se serrî dima qicê ma, teq req teq req, tornê ma do vacê, dirîng çirîng dirîng çirîng, "Yew kerraya ma ya se serrîye esta…" Teq teq teq! Çirîng çirîng çirîng! Di sey serrî badê nikayî, teq teq teq, çirîng çirîng çirîng, kerraya ma do bibo, cîng cîng cîng, di sey serrîye, teq teq teq, çirîng çirîng çirîng. Ha to rê tarîx! Teq teq teq! Çirîng çirîng çirîng! Berey-merey, teq teq teq, çirîng çirîng çirîng, ma se bikerê... Dîng cîng dîng cîng! Ganî ma cayêk ra, teq teq teq, çirîng çirîng çirîng, dest pê bikerê, çirîng çirang çirîng çirang çirîng çirang!...

Ihm... Nika ez se binusî? Hmmm, "Mi tarîxê miletê xwu..." Temam, çing çiring çirîng... "Miiiii" trîng trîng trîng "Tarîîîîî... xê..." Heh, beno wulay. Helbet do bibo, qey çî nêbo! Mevindere! Iheee eeee, "Miletê êêêê..."

(Verê Mîladî serra 2021)

-Bêrên! Bêrên ma çekuyanê xwu inê kemerî ser o binusê, wa tarîxê ma belî bo.

-Hadî ma binusê! Ez ino het ra dest pê kena, ti zî heto bîn ra binuse, bêre...

-Nêêê, winî keweno têmîyan! Ganî ma sîstematîk binusê ke dima rew fam bibo.

-Wa cayêko veng nêmano haaa…

-Yaw “xwu” raşt a “xo”?

-Xwu.

-Xo!

-Xwu!

-Xo!!

-Xwuuuu!!!

-Xooooooo!!!