Rekato Diyin

Ya Rebî, ez bi niyet a, seba rizaya to, çar rekatî ferzê nimacê nîmroce kena. Estaxfîrula tobe...

Ellahu ekber! Subhaneke Ellahumme...

Ena subhaneke zî duayeka ecêb a! Tede "we celle senauke" esta la merdim tenya cenazeyan de vano. "O cenaze yo, çi yo? Aha! We celle senauke..." Hîhîhî! Tobe ya Rebî! Ez zereyê xwu de huyena, înşala destmacê mi çî nêbeno. Boka nêbo! Hîhî! Labelê raşt zî winî yo, zey nimacê roşanî heta ke mela nêvajo nîno merdimî vîr...

Bismillahîrrehmanîrrehîm...

Çend aşmî verê cû, Dat Hemî mi ser o wend. Ey ra nat lazim nêbî... O zî lord bî la skalaya ci ya sedeqeyan ecêb bî. Tobe tobe! Rehmetî gama ke sedeqe dayne cêbê ci ra tenya vîst û panc qurişî ra heta lîrayêk pere vecîyayne. Yaw dato, o vîst û panc qurişo belengaz do senî TIRanê to yê rayîran ser o qezayan ra, daîreyanê to belayan ra, market û mixazayanê to dizdan ra sitar bikero? Peynîya peyîne, heme serwetê xwu verada û şi: "We celle senauke." Nika o pere ra tenya lacê ci xêr vînenê. Keynayê ci raya mehkema pawenê...

We îyyake neste'în...

Dezayanê mi vat "Wa lacê şarî nêwerê!" Çiyêk nêda keynayan. Înan zî vat "Cinîyê şima zî keynayê şarî yê. Eke winî yo, ma zî para xwu nêdanê keynayanê şarî!" Osmanî dima vat "Her yewa şima rê vîst milyarî." La kes razî nêbî. Silêmanî vîst kerd hîris. Labelê ancî iih!

Înna e'teyne, kel kewser...

Mi Bîloyî ra vat ha! Mi vat "Winî mekerê. Ti merdimêko zana yê, ti roşinvîrê ma yê, to hende unîversîte wende, ti şoreşgerê keyeyê Dat Hemî yê. Heqê wayanê xwu mewere!" La fam nêkerd. Ge vat "Ez dana la Şerîf qebûl nêkeno", ge vat "Edetê ma nîyo" filan bêvan...

Ellahu ekber! Subhane Rebbîyel ezîm...

Şerîf zî ecêb o! Him seba ke keyna yê, para wayanê xwu weno, him zî... Him zî lacê ci çinê yo! Panc tene keynayê ey estê. Pereyê ke wayanê xwu ra tiraweto peynî de do bido înan. Ê eynî hesab nîyo?

Semî-Elllahulîmen...

Wulay mi Meqbûla ra vat. Mi vat "Waya mi eyb o, ti veyva înan a. Mêrdeyê xwu ra vace wa winî nêkero. Eke keyeyê datê ma ra dehwaya mîrasî bivecîyo milet do vaco se!" Vat "Keko ti raşt vanê la Bîlal birayo gird nîyo, nêşeno îtiraz bikero..." De şo! Ma ez nêzana, çimsûrî keno, wazeno rizqê wayanê xwu û warzayanê xwu biwero!

Ellahu ekber! Subhane Rebbîyel e'la...

Tobe tobe...

Ya Homayê mi, tobe...

Ellahu ekber... Elhemdulîllahî...

Lacê herî! Ez vana "Telefon bide Ronîyî" la o nêwazeno... "Waya mi, o vano çi?" "Keko vano ke 'ez xaloyî ra çiyêk fam nêkena'." Her ke ez çiyêk vana, o zî maya xwu ra perseno vano "Xalo vano çi?" Bê tercuman ma nêşenê qisey bikerê!

Translate from Kurdish to Japonish...

“Keyeyê xalê mi welatêko bîn de yo, seba enê bi ziwanêko bîn qisey keno!..." Raşt a warza, ino bajaro verê dengizî welatê ma nîyo la mîyanê ma çar sey kîlometreyî yo! Of!

Lem yelîd welem...

Hadê waya mi hendayê to nêwend, coka hendeyê to nêzana. La ti çi semed ra keyeyê xwu de bi ziwanê xwu qisey nêkenê Bîlo! Ti qey çî heqê wayanê xwu nêdanê Bîloyo çimveyşan! Of!

Ellahu ekber! Subhane Rebbîyel ezîm... Subhane Rebbîyel ezîm...

Ganî ti warza û birazayanê xwu rê bibê mîsal. Ganî ti înan teşwîq bikerê ke ey zî biwanê, la nê. "Keynaya Xêrîyaya ma lacekî dir qisey kerd, mi va şerm bike!" To gî werd Bîlê mi, eferim! Dima zî waya mi to tepişt; "keko, cinîyan rê mesajan erşaweno! Înan zî ino kutikê ma rê resmê xwu erşawitê la ez şermayena ke vacî..." Of!

Semî-Elllahulîmen...

Hi? Ez rekato çendin de biya?

Ooofff!