Sayêrîstan

Sayêran nêverda! Înan edetê daranê bînan, tebîetê baxçeyî xeripna! Nêverda ke miroyêre zey xwu bibo gird. Nêverda ke gilê mehşilêran biresê daranê bînan. Hela mevajê înan çi ard tuyêran ser!...

Baxçe de sayêrî zaf bî. Seba ke winî zaf ê, înan pêro daran rê zilm û tehda kerde. Vat "Ma dara cenetî yê, Heqî ma winî pîroz xeliqnayî. Ganî şima zî zey ma bê. Dara ke zey sayêran nêbo wa wuşk bo!" Û gala daranê bînan kerd, nêverda ke gilê înan derg bê. Binê erdî de zî eynî çî kerd, rîçikê înan birnayî!...

Tuyêran persa va "Ma do senî bibê zey şima?" Sayêran projeyê xwu hazir kerdbi, va "Ganî, verê verkan, boya şima zî zey boya ma bo. Dima zî şeklê pelanê şima..." Tuyêran qebûl nêkerd, sayêran zî nêverda rîçikê înan mirdîya xwu awe bişimê. Ino wisar tuyêrî bê tûyan mendî, nîmeyê înan biyî wuşk, biyî kolî...

Miroyêran zî îtîraz kerd; eynî çî ame înan ser zî.

Sayêran semedê şiqoqan çiyêko bîn kerd, înan rê vat "Şima sayêrê koyan ê, ganî şima ageyrê eslê xwu ser, bibê sayêr..." Tayê înan qebûl kerd, qismo ke mend nika xwu ver danê...

Dara portaqalan teber ra amebî, tik û tenya bî. Tehdeya sayêran ver rew teslîm biye. Daranê bînan ci rê vat "Ti sayêre nîya, rengê meyweyanê to turuncî yo, ti zimistanan pelanê xwu nêrişnena, boya vilikanê to nêmaneno sayêran..." Înan çi vat zî portaqalêre fam nêkerd. Tersê xwu ver hende kanalîze bibî ke gala daranê bînan kerd, vat "Ganî boya sayan meyweyanê şima ra zî bêro! Ganî şima layiqê Sayêristanî bê!"

Nika sayêran ra zêde portaqalî û şiqoqê ke îqna biyê ke ê sayêrê koyan ê, gala daranê bînan kenê, wazenê heme darî bibê sayêrî...