You Can Turn Back to Factory Settings

Ganî ez tezê xwu binusnî la nê... nêbeno!

Herinda tezî de ez peyser romanan xitim kena, ewnîyena fîlman ra.

Yurt de çend "hemşerî"yê mi zî estê, yenê mi het. Ma pîya wenê, şimenê, wanenê, temaşe kenê...

Bursê mi di qatê wendekaranê bînan o; ez nêverdena ê mesref bikerê; ez kantîn ra tost, çay, kola û cîps gêna.

Wa biwerê! Inê gencê ke wanenê heq kenê! Ê do şarê ma bixelesnê…

Dersa kamî çinê bo, odaya mi der o. Ez zî hema romanan dana destê înan. Ez ciwanan teşwîq kena ke kitabanê derse ra teber zî kitaban biwanê.

Gama ke wendiş ra aciz benê, ez kompîtur de fîlman akena. Ge-ge ez sehneyêk de fîlmî vindernena û şîrove kena, diyalog û karakteran ser o fikrê înan persena. Ma bi ino şekil fîlmografîya Lars von Trier, Wes Anderson, Emir Kusturicayî de fîlmî nêverdayî.

Ewro arşîvê mi de fîlm nêmend. Mi vat ma çend tenî şirê kafeyêk înternetî, bi flaş dîskan reyna fîlmî biyarê. Reyêk de ma tereqna. Mi dî mesela şina siyasetî ser, mi rica kerd ke kes behsê polîtîka nêkero. Xwura bellî yo, her yew do çiyêko ciya vaco, tewr tay yew do biherediyo. Mi pawit ke ey zî behsê kitaban û fîlman bikerê. Mesela, yew vaco “Ez Gorkî ra hes kena”, yew vaco “Ti zî kitabanê nuştoxanê merdeyan ra teber çiyêk nêwanenê, hela Murakami, Kristeva, Modiano biwane…” Yewo bîn zî paştî bido embazê diyinî, vajo: “Kitabanê înanê ke cuwîyenê biwane, dima înternet de biewnîye konferansanê înan ra. Tayê aktuel be…” La zey texmînê mi nêbî. Mi dî embazî winî dewam kenê:

- Hêgayê ma de marêk esto, ma ey nêkişenê. Zey bekçîyê ucayî yo. Şar terseno şiro zebeş û beşilayanê ma bitirawo...

- Kutikê ma zerrî kewtbî traktor, heheee! Heme wext şiyêne binê ci de rakewtêne. Rocêk birayê mi qeza kerde, traktor bi xurde. Pîyê mi kamyonêk arde, traktore bar kerd la kutik traktor veranêda! Şi kewt zereyê kamyone, binê traktorî de xwu derg kerd û berma. Kuzekuza ci nika zî goşanê mi de ya…

- Astora ma hewt serrî ya. Ma pê cite kenê la cita ci senî temîz a! Zey greyderan a...

Mi fam kerd ke ma nêwazenê maran û kutikan û astoranê xwu ra teber medenîyetêk virazê…